बैलहोंगल तालुक्यातील तिगडी गावात असलेले हरिनाल धरण पूर्ण भरले आहे. धरणाचे विलोभनीय दृश्य पाहण्यासाठी पर्यटकांना योग्य ‘व्ह्यू पॉइंट’ नसल्याने त्यांची निराशा झाली आहे.

गेल्या काही दिवसांपासून बेळगाव जिल्ह्यात जोरदार पाऊस पडत असल्यामुळे बैलहोंगल तालुक्यातील तिगडी गावातील हरिनाल धरण भरले आहे. धरण पूर्ण भरून अतिरिक्त पाणी बाहेर वाहत असल्याचे दृश्य अतिशय सुंदर असून, हे दृश्य पाहण्यासाठी बेळगाव जिल्ह्यासह आजूबाजूच्या गावातील नागरिक आणि पर्यटक मोठ्या संख्येने येत आहेत. मात्र, या सुंदर क्षणांचा आनंद घेण्यासाठी योग्य व्ह्यू पॉइंट नसल्यामुळे पर्यटक आणि स्थानिकांमध्ये नाराजी आहे. माध्यमांशी बोलताना पर्यटकांनी, या परिसराच्या नैसर्गिक सौंदर्याचा अनुभव घेण्यासाठी सुरक्षित आणि सुसज्ज व्यवस्था असायला हवी होती, असे मत व्यक्त केले.

एका स्थानिक नागरिकांनी सांगितले, “दरवर्षी धरण भरल्यावर पाण्याचा प्रवाह पाहण्यासाठी लोक येतात. मात्र, बघण्यासाठी योग्य जागा नसल्यामुळे खूप त्रास होतो आहे. संबंधित अधिकाऱ्यांनी तातडीने यावर उपाययोजना करून व्ह्यू पॉइंट बांधावा.” अशी विनंती त्यांनी केली.  सध्या, पाटबंधारे विभाग आणि तालुका अधिकारी यावर लक्ष देऊन पर्यटकांसाठी व्ह्यू पॉइंट बांधतात का, हे पाहणे महत्त्वाचे आहे. या परिसरात पर्यटनाला चालना देण्यासाठी ही एक चांगली संधी असून, यावर प्रशासनाच्या पुढील निर्णयाकडे सर्वांचे लक्ष लागून आहे.