आरसीबीच्या जल्लोषादरम्यान झालेल्या चेंगराचेंगरीच्या घटनेवर न्यायमूर्तींनी अहवाल सादर केला असून, त्यावेळी कोणत्याही विभागाकडून परवानगी घेण्यात आली नव्हती. मोठ्या संख्येने लोक एकत्र येण्याचा तो कार्यक्रम होता आणि सुरक्षा देणाऱ्या पोलिसांनीही परवानगी दिली नव्हती, अशी माहिती मंत्री सतीश जारकीहोळी यांनी दिली. न्यायमूर्तींचा मोठा अहवाल असून, त्याचा संपूर्ण अभ्यास करून सरकार योग्य ती कारवाई करेल, असेही ते म्हणाले.

शुक्रवारी बेळगाव शहरात पत्रकारांशी बोलताना जारकीहोळी म्हणाले की, हिडकल जलाशयातून यापूर्वी नदीत ५ हजार क्यूसेक पाणी सोडले होते, आता ते अधिक प्रमाणात सोडले असावे. काँग्रेसचे राज्य प्रभारी रणदीपसिंग सुर्जेवाला यांच्या भेटीदरम्यान, गेल्या दोन वर्षांत आमच्या विभागाने केलेल्या कामांवर आणि आमदारांना किती निधी दिला यावर चर्चा झाली. केपीसीसी अध्यक्षांच्या बदलावर कोणतीही चर्चा झाली नाही, केवळ विकासासंदर्भात चर्चा झाली, असे त्यांनी स्पष्ट केले. अध्यक्षांचा बदल करणे आमच्या अखत्यारीत नाही, ते हायकमांडच्या अखत्यारीत आहे आणि तो त्यांचा निर्णय असेल, असे मंत्री सतीश जारकीहोळी यांनी सांगितले.