बेळगाव तालुक्यातील संतीबस्तवाड येथे धर्मग्रंथाची विटंबना झाल्याच्या प्रकरणाच्या तपासाच्या नावाखाली निष्पाप हिंदू तरुणांना अटक करून त्रास दिला जात असल्याचा आरोप करत, आज बेळगावात हिंदू जनआक्रोश रॅली काढण्यात आली.

संतीबस्तवाडमधील धर्मग्रंथ विटंबना प्रकरणाची योग्य चौकशी करण्याऐवजी, केवळ निष्पाप हिंदू तरुणांना अटक करून त्रास देण्याच्या पोलीस धोरणाचा निषेध करत, पारदर्शक चौकशीच्या मागणीसाठी आज बेळगावच्या राणी चन्नम्मा चौकात विविध हिंदू संघटनांच्या सहकार्याने संतीबस्तवाडच्या ग्रामस्थांनी भव्य निदर्शने केली.

यावेळी बोलताना माजी आमदार संजय पाटील म्हणाले, बेळगावात सर्व जाती-धर्माचे लोक एकवटले आहेत. कोणत्याही धर्माच्या ग्रंथाची विटंबना करणे निंदनीय आहे. पोलिसांनी याची योग्य चौकशी करावी. मात्र, कोणाच्यातरी दबावाखाली येऊन केवळ हिंदू तरुणांना अटक करून त्रास देणे योग्य नाही.

संतीबस्तवाड गावातील वकील प्रसाद म्हणाले, मशिदीच्या चाव्या आणि धर्मग्रंथ कुठे आहेत, हे हिंदूंना कसे कळणार? ग्रामपंचायत किंवा पोलिसांच्या निदर्शनास न आणता सीसीटीव्ही कसे हटवले गेले? मौलाना गावात नसताना ही घटना कशी घडली? केवळ एकाच बाजूने तपास करणे योग्य नाही. निष्पाप हिंदू तरुणांना अटक करून ४-५ दिवस पोलीस ठाण्यात ठेवणे चुकीचे आहे.

आणखी एका ग्रामस्थाने सांगितले की, हे एक षड्यंत्र आहे. नायक समाजातील तरुणी एका दुसऱ्या समाजातील तरुणासोबत घरातून पळून गेल्यामुळे ही घटना घडली आहे. डॉग स्क्वॉड आल्यावर त्याने दुसऱ्या समाजाच्या तरुणाकडेच पाहून भुंकले, हे दाबले गेले आहे. संतीबस्तवाडमधील हिंदू तरुणांवर अत्याचार न करता, दोन्ही बाजूंनी तपास करावा.

धनंजय जाधव बोलताना म्हणाले, पोलिसांच्या भीतीमुळे निष्पाप हिंदू तरुणांना गाव सोडावे लागत आहे. हे एक सुनियोजित षड्यंत्र आहे. पोलिसांवर राजकीय दबाव असल्याचा संशय व्यक्त होत असून हिंदूंना त्रास दिल्यास, संपूर्ण जिल्ह्यातून ‘चलो संतीबस्तवाड’ आंदोलन करावे लागेल, असा इशारा त्यांनी दिला.

या संदर्भात जिल्हाधिकाऱ्यांना निवेदन सादर करण्यात आले. यावेळी हजारो हिंदू कार्यकर्ते आणि संतीबस्तवाडचे ग्रामस्थ उपस्थित होते.