पहलगाम येथे झालेल्या दहशतवादी हल्ल्याला भारतीय सैन्य ‘ऑपरेशन सिंधूर’द्वारे देत असलेल्या प्रत्युत्तराच्या समर्थनार्थ बेळगावमध्ये आज राणी चन्नम्मा विद्यापीठाच्या वतीने विद्यार्थ्यांची भव्य रॅली काढण्यात आली.

शनिवारी बेळगाव शहरात राणी चन्नम्मा विद्यापीठाच्या विद्यार्थ्यांनी एकत्र येत भारतीय सैन्य आणि केंद्र सरकारला पाठिंबा दर्शवण्यासाठी ही रॅली आयोजित केली होती. ‘भारत माता की जय’ च्या घोषणा देत विद्यार्थी मोठ्या संख्येने या रॅलीत सहभागी झाले होते.

यावेळी बोलताना राणी चन्नम्मा विद्यापीठाचे कुलगुरू प्राध्यापक सी.एम. त्यागराज म्हणाले की, केंद्र सरकार आणि भारतीय सैन्याला पाठिंबा देण्यासाठी विद्यापीठाच्या वतीने ‘ऑपरेशन सिंधूर यात्रा’ काढण्यात आली आहे. विद्यार्थी शक्ती हीच राष्ट्रशक्ती असून, सर्वांनी एकत्र येऊन आपल्या सैनिकांना पाठिंबा द्यायला हवा, असे आवाहन त्यांनी केले.

विविध विभागांच्या प्रमुखांनीही या रॅलीमागील उद्देश स्पष्ट केला. विद्यार्थ्यांमध्ये देशप्रेम आणि देशभक्ती जागृत व्हावी यासाठी ही रॅली काढण्यात येत असून, युवा पिढीने देशावरील कोणत्याही आक्रमणावेळी एकत्र येऊन आवाज उठवला पाहिजे, असे ते म्हणाले.

एका विद्यार्थिनीने यावेळी बोलताना ‘सिंदूर’ हा महिलांसाठी अत्यंत महत्त्वाचा असल्याचे नमूद केले. विद्यार्थ्याने पहलगाम हल्ल्याचा संदर्भ देत, ज्यांनी हा सिंदूर पुसण्याचा प्रयत्न केला त्यांना ‘ऑपरेशन सिंधूर’द्वारे पुसले जात आहे, असे सांगितले. पहलगाम हल्ल्यात शहीद झालेल्यांना न्याय मिळवून दिल्याबद्दल विद्यार्थ्यांनी भारतीय सैन्य आणि पंतप्रधान मोदी यांचे आभार मानले.

बेळगाव जिल्हा क्रीडांगणापासून सुरू झालेली ही रॅली कोल्हापूर सर्कल, डॉ. बी.आर. आंबेडकर मार्गे राणी चन्नम्मा सर्कल येथे पोहोचून समाप्त झाली. या रॅलीत विद्यार्थी, कर्मचारी आणि इतर नागरिक मोठ्या संख्येने सहभागी झाले होते.