पहलगाममधील दहशतवादी हल्ल्याला चोख प्रत्युत्तर देताना भारताने पाकिस्तानातील दहशतवादी तळांवर ऑपरेशन सिंधूर अंतर्गत जोरदार क्षेपणास्त्र हल्ला केला. या कारवाईच्या पार्श्वभूमीवर बेळगावच्या खडक गल्ली परिसरात मोठा जल्लोष साजरा करण्यात आला.

जम्मू-काश्मीरच्या पहलगाम येथे नुकत्याच झालेल्या दहशतवादी हल्ल्यात २६ निष्पाप भारतीय नागरिकांचा मृत्यू झाला होता. या भ्याड हल्ल्याचा बदला घेण्यासाठी भारताने ७ मेच्या मध्यरात्री ‘ऑपरेशन सिंधूर’ राबवत पाकिस्तानातील दहशतवादी तळांवर क्षेपणास्त्र हल्ला केला.

या कारवाईत पाकिस्तानात स्थित सुमारे ९ दहशतवादी तळ उद्ध्वस्त करण्यात आले असून, जैश-ए-मोहम्मद व लष्कर-ए-तैयबा या संघटनांवर थेट प्रहार करण्यात आला आहे. भारतीय लष्कराच्या या कडक कारवाईचे देशभरात स्वागत होत असून बेळगावच्या खडक गल्ली परिसरातील नागरिकांनी फटाके फोडून, जयघोष करत विजयोत्सव साजरा केला.