२०२६-२७ या वर्षासाठी हिडकल जलाशयातून सिंचनाकरिता तीन टप्प्यांत पाणी सोडण्यात येणार आहे. उपलब्ध पाण्याचा जपून आणि नियोजनबद्ध वापर करावा, असे आवाहन सार्वजनिक बांधकाम मंत्री तथा बेळगाव जिल्ह्याचे पालकमंत्री सतीश जारकीहोळी यांनी केले.

जलाशयातून जीआरबीसी, जीएलबीसी कालवे आणि घटप्रभा नदीत पाणी सोडण्यात येत आहे. शेतकऱ्यांनी सिंचनाचे वेळापत्रक लक्षात घेऊन गरजेनुसार पाण्याचा वापर करावा. अनावश्यक पाणी सोडून त्याचा अपव्यय करू नये, असे त्यांनी सांगितले.

जलसंपत्ती हा शेती आणि सार्वजनिक जीवनाचा महत्त्वाचा आधार आहे. त्यामुळे पाण्याचे संवर्धन करणे ही सर्वांची जबाबदारी आहे. उपलब्ध पाण्याचा विचार करून शेतकरी आणि नागरिकांनी काटकसरीने वापर करावा तसेच पाण्याचा अपव्यय आणि गैरवापर टाळावा, असे आवाहन सतीश जारकीहोळी यांनी केले.