ऊसाला प्रतिटन ५,५०० रुपये दर जाहीर करावा, या मागणीसाठी चिक्कोडी तालुक्यातील शेतकऱ्यांनी मांजरी येथे तीव्र आंदोलन केले. रस्त्यावरच स्वयंपाक करून भोजन घेत शेतकऱ्यांनी सरकारच्या निषेधार्थ ठिय्या मांडला.

मांजरी गावाजवळील चिक्कोडी-मिरज मुख्य मार्ग शेकडो शेतकऱ्यांनी सकाळपासून रोखून धरला. मांजरी, येडूर, चंदूर, इंगळी यांसह परिसरातील गावांमधील शेतकरी आंदोलनात सहभागी झाले होते. सरकार आणि लोकप्रतिनिधींच्या दुर्लक्षाविरोधात घोषणाबाजी करत त्यांनी दिवसभर धरणे धरले.

दुपारच्या भोजनासाठी शेतकऱ्यांनी रस्त्यावरच स्वयंपाक केला आणि एकत्र बसून भोजन घेतले. मागण्या मान्य होईपर्यंत आंदोलनस्थळावरून हटणार नसल्याचा निर्धार त्यांनी व्यक्त केला.

या आंदोलनामुळे मिरज आणि चिक्कोडीला जोडणाऱ्या मुख्य मार्गावरील वाहतूक पूर्णपणे ठप्प झाली. प्रवाशांना मोठ्या गैरसोयीचा सामना करावा लागला. अनुचित प्रकार घडू नये यासाठी घटनास्थळी कडेकोट पोलीस बंदोबस्त ठेवण्यात आला होता.