अन्नदान हेच श्रेष्ठ कार्य असा संदेश देत राज्यातील विविध धार्मिक कार्यक्रम, यात्रा आणि भाविकांच्या सोहळ्यांमध्ये महाप्रसादाच्या माध्यमातून सेवा बजावणाऱ्या बंडिगणी मठाच्या श्रींची अन्नदान परंपरा आज आजही अखंड सुरू आहे.

बागलकोट जिल्ह्यातील रबकवी-बनहट्टी तालुक्यातील बंडिगणी गावच्या श्री दानेश्वर अप्पाजी यांची अन्नदान सेवा अनेक भागांत प्रसिद्ध होती. धार्मिक यात्रा, मठांचे कार्यक्रम आणि भाविकांच्या मेळाव्यात अन्नदानाला प्राधान्य देणाऱ्या श्रींनी भुकेलेल्यांना अन्न देणे हीच ईश्वरसेवा मानली होती. कर्नाटकसह शेजारील महाराष्ट्र आणि आंध्र प्रदेशातील विविध भागांतही ही परंपरा त्यांनी पोहोचवली होती. श्रींची सेवा केवळ अन्नदानापुरती मर्यादित नव्हती; तर गरीब व असहाय घटकांना मदत करणे आणि सामूहिक विवाहासारख्या सामाजिक उपक्रमांना मठाच्या वतीने सदैव प्रोत्साहन दिले जात असे. भक्ती, सेवा आणि मानवतेचा संगम असलेल्या या कार्यामुळे अनेक भाविकांना प्रेरणा मिळाली.

आता श्रींच्या पश्चातही त्यांच्या अन्नदानाचा विचार भक्तांनी जिवंत ठेवला आहे. तुळजाभवानीच्या दर्शनासाठी निघालेल्या पदयात्रींना सलग पाच दिवस पक्वान्नांचे भोजन देऊन सेवा केली जात आहे. दूरवरून चालत येणाऱ्या भाविकांच्या भोजनाची सोय करून त्यांच्या प्रवासात मदत करणे हीच श्रींच्या अन्नदान परंपरेची साक्ष आहे. श्री आज आपल्यात नसले तरी त्यांनी दाखवलेला मार्ग थांबलेला नाही. श्रींचा सेवाभावी संकल्प भक्त पुढे नेत असून तुळजापूरच्या पदयात्रींसाठी सुरू असलेले हे अन्नछत्र भक्ती, सेवा आणि मानवतेचा संदेश देत आहे.