बौद्ध धर्माचा प्रसार आणि डॉ. बाबासाहेब आंबेडकर यांचे आदर्श विचार प्रत्येकाने आपल्या जीवनात आचरणात आणले पाहिजेत, असे प्रतिपादन हुक्केरी समाजकल्याण सहाय्यक संचालक गुरुशांत पावटे यांनी केले.

डॉ. बी. आर. आंबेडकर यांनी बौद्ध धर्माची दीक्षा घेतलेल्या नागपूरच्या पवित्र भूमीला भेट देण्यासाठी हुक्केरी तालुक्यातील समाजबांधव रवाना झाले. याप्रसंगी समाजबांधवांनी हुक्केरी शहरातील डॉ. बाबासाहेब आंबेडकर यांच्या पुतळ्याला अभिवादन करून यात्रेचा शुभारंभ केला.

कर्नाटक सरकार, समाजकल्याण विभाग आणि तालुका प्रशासनाच्या वतीने या धम्मयात्रेसाठी वाहतूक व्यवस्था करण्यात आली आहे. हुक्केरी तालुक्यातून महिलांसह १३० यात्रेकरू नागपूरसाठी रवाना झाले असून, त्यांची ही यात्रा सुखकर व्हावी आणि आंबेडकरी विचार सर्वांना प्रेरणादायी ठरावेत, असा विश्वास गुरुशांत पावटे यांनी व्यक्त केला.

त्यानंतर सरकारी कर्मचारी संघाचे तालुकाध्यक्ष अविनाश होळेप्पगोळ यांनी धम्मयात्रेचा शुभारंभ केला. याप्रसंगी समाजकल्याण अधिकारी आणि स्थानिक नागरिक उपस्थित होते.