कन्नड साहित्य परिषद ही कन्नडिगांची सार्वभौम संस्था असून संपूर्ण कर्नाटकचा आवाज म्हणून कार्यरत आहे, असे प्रतिपादन ज्येष्ठ साहित्यिक डॉ. सरजू काटकर यांनी बेळगावात केले.

बेळगाव येथील कन्नड साहित्य परिषद आणि कन्नड सांस्कृतिक भवन विकास संघ यांच्या संयुक्त विद्यमाने आयोजित करण्यात आलेल्या सत्कार सोहळ्यात ते प्रमुख पाहुणे म्हणून बोलत होते. परिषदेच्या जिल्हाध्यक्षा मंगला मेटगुड्ड यांच्या अध्यक्षतेखाली झालेल्या या कार्यक्रमाचे उद्घाटन ताई भुनेश्वरी देवीच्या पूजेने आणि रोपट्याला पाणी घालून करण्यात आले.

यावेळी बोलताना डॉ. सरजू काटकर म्हणाले की, शंभरी ओलांडलेली कन्नड साहित्य परिषद जेव्हा बोलते, तेव्हा ते संपूर्ण कर्नाटक आणि कन्नडिगांचे बोलणे असते. भूतकाळात जी. नारायण अध्यक्ष असताना एका रुपयाच्या सदस्यशिप मोहिमेद्वारे पाच लाख सदस्य जोडण्यात आले होते. तसेच १९८४ च्या गोकाक चळवळीचा इतिहास सांगताना ते म्हणाले की, धारवाडची विद्यावर्धक संघ संस्था या ऐतिहासिक चळवळीचे केंद्रबिंदू होती आणि तेथून सुरू झालेली चळवळीची धग संपूर्ण राज्यात पसरली होती.

कार्यक्रमात डॉ. बी. एच. मेटगुड्ड, डॉ. वनिता मेटगुड्ड आणि साहित्यिक य. रु. पाटील प्रमुख उपस्थित होते. याप्रसंगी मल्लिकार्जुन कनशेट्टी, सुरेश हम्जी, ईरणगौडा पाटील आणि डॉ. यल्लप्पा याकोळ्ळी यांसह अनेक पत्रकारांचा सत्कार करण्यात आला. कार्यक्रम यशस्वी करण्यासाठी के. ए. दयानंद, एम. वाय. मेणसिनकाई, रत्नप्रभा बेल्लद, वीरभद्र अंगडी आणि सुनील हलवाई यांनी परिश्रम घेतले.