बळ्ळारी जिल्ह्यात पावसाने ऐन मोसमात दगा दिल्यामुळे लाखो रुपये खर्च करून घेतलेले तुरीचे पीक पूर्णपणे करपून गेले आहे. कर्ज काढून पेरणी केलेल्या शेतकऱ्यांचे पीक तर हातचे गेलेच, शिवाय गुरांच्या चाऱ्याचाही गंभीर प्रश्न निर्माण झाल्याने बळीराजा हवालदिल झाला आहे.

यंदा पावसाने सर्वच भागात दडी मारल्याने भीषण दुष्काळाच्या झळा जाणवू लागल्या आहेत. पावसाच्या अभावामुळे बळ्ळारीतील तुरीचे पीक देखील डोळ्यादेखत करपले असून हताश झालेल्या शेतकऱ्याला सध्या सरकारी मदतीची आस लागली आहे. अशातच सरकारने जाहीर केलेली तुटपुंजी भरपाई अद्याप खात्यात जमा न झाल्याने संतप्त झालेल्या शेतकऱ्यांनी केंद्र व राज्य सरकारने प्रतिएकर किमान २० हजार रुपयांची मदत द्यावी, अशी जोरदार मागणी केली आहे.

बळ्ळारी तालुक्यातील हलकुंदी गावाच्या परिसरात पावसाअभावी तुरीचे पीक पूर्णपणे उद्ध्वस्त झाले आहे. भांडवल गुंतवून कष्टाने उभ्या केलेल्या पिकावर दुष्काळामुळे सध्या नांगर फिरवण्याची वेळ आली आहे. पीक हातातून गेल्याने आणि कर्जाचा डोंगर डोक्यावर असल्याने शेतकरी हताश झाले आहेत.

अशा संकटात सरकारने प्रतिएकर २५०० रुपयांची किरकोळ भरपाई जाहीर केली, परंतु ती मदतही अद्याप एकाही शेतकऱ्याच्या हाती पडलेली नाही. ही जाहीर केलेली रक्कम लागवड खर्च भरून काढण्यासही अत्यंत तोकडी आहे, असा संताप व्यक्त करत सरकारने तात्काळ प्रतिएकर २० हजार रुपयांची विशेष मदत मंजूर करावी, अशी मागणी शेतकऱ्यांनी केली आहे.