एसआयआरच्या (विशेष संक्षिप्त पुनरीक्षण) नावाखाली पात्र मतदारांचा मतदानाचा हक्क हिरावण्याचा प्रयत्न केला जात आहे, असा गंभीर आरोप विजापूरचे पालकमंत्री एम. बी. पाटील यांनी केला आहे.

पत्रकार परिषदेत बोलताना एम. बी. पाटील यांनी सांगितले की, नियमानुसार अपात्र मतांची छाननी करून ती वगळण्यास आपला विरोध नाही. मात्र, केवळ निवडणूक जिंकण्याच्या उद्देशाने पात्र मतदारांची नावे पद्धतशीरपणे हटवणे लोकशाहीसाठी घातक आहे.

आपल्या मतदारसंघात १,३७२ मतांसाठी तर विजापूर शहर मतदारसंघात एकूण १३ हजार मतांविरोधात एकत्र (बल्क) फॉर्म-७ अर्ज सादर करण्यात आले होते, असा दावा त्यांनी केला. कायद्यात अशा प्रकारे एकत्रित अर्ज सादर करण्याची तरतूद नसल्याने अर्जदारांनी नंतर ते मागे घेतले, असेही त्यांनी नमूद केले. या प्रकरणाची सखोल चौकशी व्हावी आणि निवडणूक प्रक्रियेतील त्रुटींवर भाष्य करताना जातीचा वापर केला जाऊ नये, असे त्यांनी स्पष्ट केले.