विजापूर शहरात यंदाचा गणेशोत्सव अत्यंत शिस्तबद्ध आणि पर्यावरणपूरक वातावरणात साजरा करण्यासाठी पूर्वभावी तयारी सुरू झाली आहे. आमदार बसणगौडा पाटील यत्नाळ यांच्या उपस्थितीत झालेल्या बैठकीत याबाबत महत्त्वपूर्ण निर्णय घेण्यात आले.

विजापूरच्या श्री सिद्धेश्वर मंदिरातील शिवानुभव मंडपात स्वामी विवेकानंद सेनेच्या श्री गजानन महामंडळाने सर्व गणेश मंडळांची बैठक आयोजित केली होती. या बैठकीचे उद्घाटन करताना आमदार यत्नाळ यांनी पर्यावरणाच्या रक्षणासाठी मातीच्या व फायबरच्या मूर्तींची स्थापना करण्याचे आवाहन केले. तसेच यंदापासून उत्सवाला शिस्त आणण्यासाठी दिवसाच विसर्जन मिरवणूक काढण्याची पद्धत सुरू करावी, असा सल्ला त्यांनी दिला.

यावेळी विविध मंडळांच्या पदाधिकाऱ्यांनी मिरवणुकीचा मार्ग, शिस्त आणि सुरक्षेबाबत चर्चा केली. या बैठकीस महापौर एम. एस. करडी, पालिका सदस्य शिवरुद्र बागलकोट, राहुल जाधव, किरण पाटील, राजू कुरियावर, महापालिका आयुक्त तसेच पोलीस अधिकारी उपस्थित होते.

दिवसा विसर्जन मिरवणूक काढून यंदाचा उत्सव आदर्शवत साजरा करूया, असे आमदार बसणगौडा पाटील यत्नाळ म्हणाले.