कर्नाटक आणि महाराष्ट्र राज्यांना जोडणारा आणि दूधगंगा नदीवर बांधलेला मलिकवाड-दत्तवाड पूल अत्यंत जीर्ण झाला असून, पुलावरील काँक्रीट उखडल्यामुळे त्याची दयनीय अवस्था झाली आहे. यामुळे मोठा अपघात होण्याची भीती निर्माण झाली असून, परिसरातील नागरिकांमध्ये मोठी चिंता आहे.

घोस्रवाड, दत्तवाड, मलिकवाड, सदलगा, नेज, नागराळ, वडगोळ आणि याद्यानवाडी यांसारख्या अनेक गावांसाठी हा पूल वरदान ठरला आहे. या पुलावरून दररोज शेकडो नागरिक वाहनांनी प्रवास करतात. मात्र, पुलाची सध्याची अवस्था अत्यंत धोकादायक आहे.

सातत्याने येणारे पूर आणि पुलावरून होणारी अवजड वाहनांची प्रचंड वाहतूक यामुळे ही स्थिती ओढवली असल्याचे दिसून येते. पुलावरील काँक्रीट अनेक ठिकाणी उखडले आहे. काही ठिकाणी सिमेंटचे खांब देखील तुटले आहेत. काँक्रीट निघून गेल्यामुळे पुलाच्या दोन्ही बाजूंना भेगा पडल्या आहेत.

महाराष्ट्र आणि कर्नाटक राज्यांना जोडणारा मुख्य मार्ग म्हणून या पुलाचा वापर होतो. यामुळे, या जीर्ण पुलामुळे कधीही मोठा अपघात होऊन जीवित व वित्तहानी होण्याची शक्यता आहे. संबंधित अधिकाऱ्यांनी या पुलाची तातडीने दुरुस्ती करावी, अशी विनंती या भागातील नागरिकांनी केली आहे.