राज्य सरकारच्या मागासवर्ग कल्याण विभागातर्फे सुरू असलेल्या जातगणतीमध्ये हिंदूंच्या जातींसमोर ‘ख्रिस्ती’ हा शब्द जोडला जात असल्याचा आरोप विधान परिषदेचे माजी सदस्य महांतेश कवटगीमठ यांनी केला आहे.

चिकोडी येथील पत्रकार परिषदेत बोलताना त्यांनी सरकार सर्व जातींसमोर ‘ख्रिस्ती’ या शब्दाचा वापर करून हिंदूंवर अन्याय करत असल्याचे सांगितले. राज्य सरकारने काढलेला हा आदेश तात्काळ मागे घेऊन जनतेची माफी मागावी, अशी मागणी त्यांनी केली.

या आदेशाविरोधात राज्यव्यापी आंदोलन केले जाईल. उपविभागीय अधिकाऱ्यांमार्फत सरकारला निवेदन सादर केले जाईल. राज्य सरकार धर्म आणि जातींमध्ये वाद निर्माण करत असल्याचा आरोपही त्यांनी केला.

या विषयावर सरकारचे लक्ष वेधण्यासाठी सर्व जातींच्या नेत्यांची बैठक घेण्यात येईल, अशी माहितीही त्यांनी दिली. या बैठकीत सर्व जातींचे नेते सहभागी होतील.

पत्रकार परिषदेला अमृत कुलकर्णी, महेश भाते, पवनकुमार महाजन, संजय पाटील, सिद्धार्थ गायगोळ आणि लक्ष्मण डंगेर यांच्यासह इतर नेते उपस्थित होते.