डिसेंबर 12 रोजी सुवर्णसौधसमोर विविध मागण्यांसाठी माजी सैनिक आंदोलन करणार असल्याची घोषणा जिल्हा माजी सैनिक संघटनेचे अध्यक्ष बसप्पा तळवार यांनी केली आहे.

बेळगाव येथे आयोजित पत्रकार परिषदेत बसप्पा तळवार यांनी माहिती दिली की, येत्या हिवाळी अधिवेशनात माजी सैनिकांच्या मागण्यांकडे सरकारने लक्ष द्यावे, यासाठी 12 डिसेंबर रोजी सुवर्णसौधसमोर आंदोलन केले जाणार आहे.

ते म्हणाले की, माजी सैनिकांच्या मुलांना शाळांमध्ये 10 टक्के आरक्षण देण्याची मागणी अनेक वेळा करण्यात आली, मात्र अद्याप सरकारने याकडे दुर्लक्ष केले आहे. तसेच, निवृत्तीपूर्वी सैनिकांना जमीन देण्याचे आश्वासन सरकारने बजेटमध्ये दिले होते, पण अद्याप अंमलबजावणी झाली नाही. तसेच, निवृत्त सैनिकांना त्वरित शासकीय नोकरी उपलब्ध करून द्यावी, अशी मागणीही या आंदोलनाद्वारे केली जाणार असल्याचे तळवार यांनी स्पष्ट केले.

या पत्रकार परिषदेस एन. कळसण्णवर, शंकर हर्जे, अडिकप्पा मणगुट्टी यांसारखे अन्य सदस्य उपस्थित होते.