खानापूर तालुक्यात आत्महत्या केलेला युवक व त्याची आई असलेला दावा करणारी महिला हे मायलेक नसल्याचे पोलीस तपासात स्पष्ट झाल्याची माहिती जिल्हा पोलीस अधीक्षक डॉ. भीमाशंकर गुळेद यांनी दिली.

बेळगावात बुधवारी आपल्या कार्यालयात पत्रकार परिषदेत बोलताना जिल्हा पोलीस अधीक्षक डॉ. भीमाशंकर गुळेद म्हणाले की, मृत बसवराज हे गेल्या 14 वर्षांपासून शांतव्वासोबत होते. हे दोघे मजुरीच्या कामासाठी गोवा, बेंगळूर अशा अनेक ठिकाणी जात असत. बसवराजने आत्महत्या केल्यानंतर आपण त्याची आई असल्याचा दावा शांतव्वाने केला होता. मात्र खऱ्या पालकांना बोलावून विचारपूस केल्यावर तिचा दावा खोटा असल्याचे सिद्ध झाल्याचे त्यांनी सांगितले.

31 जानेवारी रोजी नंदगड पोलीस ठाण्याच्या हद्दीतील लिंगनमठ परिसरात एका अज्ञात युवकाचा मृतदेह गळफास घेतलेल्या स्थितीत आढळून आला होता. याप्रकरणी आमच्या पोलिसांनी तपास सुरू केला. मृतदेहासोबत एक मोबाईलही सापडला होता. त्याप्रकरणी प्राथमिक तपासात काही तथ्य उघडकीस आले होते. एका महिलेने या मोबाईलला दुसऱ्याच्या मोबाईलवरून फोन केला होता.

आमच्या पोलीस कर्मचाऱ्यांनी अळणावर येथे जाऊन तपासणी केली असता एक 58 वर्षीय महिला आढळून आली आणि त्यांनी महिलेला आणले असता त्या महिलेचे नाव शांतव्वा असून मृताची आई असल्याचे तिने सांगितले.  मात्र मृत तरुण व महिला हे दोघे मायलेक नसल्याचे स्पष्ट झाले आहे. मृत तरुणाच्या खऱ्या आई-वडीलांना बोलावून चौकशी करण्यात आली आहे. मयताच्या मृत्यूचे नेमके कारण समजू शकलेले नाही. शांताव्वा ही महिला ट्रेनमधून प्रवास करत असताना मद्यधुंद अवस्थेत पडली. प्रवाशांशी हाणामारी. ही घटना अळणावरपासून 7 किमी अंतरावर घडली.