Athani

अथणीतील अधिकाऱ्याच्या बदलीचा मुद्दा चर्चेत

Share

अथणी तालुक्यात एका अधिकाऱ्याने सुमारे २६ ते २७ वर्षे विविध पदांवर सेवा बजावल्याचा मुद्दा चर्चेत आला आहे. बदलीच्या नियमांनुसार इतका दीर्घकाळ एकाच तालुक्यात सेवा कशी सुरू राहिली, असा प्रश्न उपस्थित होत आहे.

अथणी तालुक्यातील नंदेश्वर येथे ग्रामलेखाधिकारी म्हणून सेवेला सुरुवात केलेले अप्पासाब पांड्रे यांनी आपल्या सेवाकाळात बेळगाव जिल्ह्यातील रायबाग आणि चिक्कोडी तालुक्यांत अल्पकाळ काम केले. त्यानंतर पुन्हा अथणी तालुक्यात परतून विविध पदांवर सेवा सुरू ठेवली. सध्या ते अथणी येथे प्रथम श्रेणी सहायक म्हणजेच एफडीसी पदावर कार्यरत आहेत.

ग्रामलेखाधिकारी पदापासून विविध पदांवर काम करत इतकी वर्षे एकाच तालुक्यात सेवा सुरू राहिल्याने या प्रकरणाबाबत अनेक प्रश्न उपस्थित होत आहेत.

एका तालुक्यात इतका दीर्घकाळ सेवा बजावण्याची परवानगी कोणत्या नियमांनुसार मिळाली? संबंधित कर्मचाऱ्याला विशेष सवलत देण्यात आली असल्यास त्यामागील कारणे काय आहेत? या बाबी वरिष्ठ अधिकाऱ्यांच्या निदर्शनास आल्या नव्हत्या का, असे प्रश्न सार्वजनिक स्तरावर उपस्थित केले जात आहेत.

या पार्श्वभूमीवर बेळगावचे जिल्हाधिकारी मोहम्मद रोशन या प्रकरणाची गांभीर्याने दखल घेऊन संबंधित कर्मचाऱ्याचा सेवाकाळ, बदलीचे दस्तऐवज आणि नियमांनुसार दिलेल्या सवलतींची तपासणी करणार का, याकडे नागरिकांचे लक्ष लागले आहे.

जिल्हा प्रशासनाने या प्रकरणाची सविस्तर चौकशी करून वस्तुस्थिती स्पष्ट करावी. बदली नियमांचे उल्लंघन झाल्याचे आढळल्यास नियमानुसार योग्य कारवाई करावी, अशी मागणी सार्वजनिक स्तरावर होत आहे.

सिद्धारूढ बन्नद| इन न्यूज, अथणी

Tags: