सत्ता कायमस्वरूपी नसते, मात्र सत्तेच्या माध्यमातून केलेली विकासकामे आणि जनहिताची कामे कायम स्मरणात राहतात, असे प्रतिपादन राज्यसभेचे माजी खासदार ईरण्णा कडाडी यांनी केले.

शुक्रवारी मसगुप्पी येथील श्री महालक्ष्मी हायस्कूलच्या आवारात राज्यसभा खासदार स्थानिक क्षेत्र विकास निधीतून बांधण्यात आलेल्या नूतन शाळा खोलीचे तसेच श्री महालक्ष्मी मंदिराजवळील समाजभवनाचे उद्घाटन त्यांच्या हस्ते करण्यात आले.

ग्रामीण भागातील शैक्षणिक विकास हाच देशाच्या प्रगतीचा पाया आहे. विद्यार्थ्यांना उत्तम सुविधा आणि शैक्षणिक वातावरण उपलब्ध करून देणे आपले कर्तव्य आहे. खासदार निधी आणि कंपन्यांच्या सीएसआर निधीतून शाळांच्या पायाभूत सुविधा मजबूत करण्यात आल्या आहेत. विद्यार्थ्यांनी या सुविधांचा लाभ घेऊन शैक्षणिक क्षेत्रात प्रगती करावी, असे आवाहन त्यांनी केले.

मसगुप्पी गावाच्या विकासासाठी खासदार निधीतून विविध कामांसाठी अनुदान देण्यात आले आहे. श्री महालक्ष्मी हायस्कूलच्या खोलीसाठी १२.५० लाख रुपये, महालक्ष्मी मंदिरासाठी ५ लाख, विठ्ठल मंदिराजवळील समाजभवनासाठी ५ लाख, महर्षी भगीरथ मंदिराजवळील समाजभवनासाठी ५ लाख, सरकारी उच्च प्राथमिक शाळेतील खोलीसाठी २.५० लाख आणि संकेश्वर-संगम राष्ट्रीय महामार्ग ५१ ते महालक्ष्मी मंदिरापर्यंतच्या सिमेंट रस्त्यासाठी १५ लाख रुपये मंजूर करण्यात आल्याची माहिती त्यांनी दिली. गावाच्या भविष्यातील विकासकामांसाठीही सहकार्य कायम राहील, अशी ग्वाही त्यांनी दिली.

यावेळी शिक्षण संस्थेचे अध्यक्ष भीमशेप्पा देवरमनी, उपाध्यक्ष बंधुसाब नदाफ, सचिव रेवण्णा तोडकार यांच्यासह स्थानिक पदाधिकारी, नागरिक, शिक्षक आणि विद्यार्थी उपस्थित होते.