बेळगावातील शेतकरी आंदोलन आणि जेलभरो चळवळीने आता वेग घेतला आहे. पोलिसांच्या ताब्यातून सुटका झाल्यानंतर शून्यसंपादन मठाचे शशिकांत गुरूजी यांनी राज्यातील सर्व शेतकरी आणि शेतकरी नेत्यांना गुर्लापूर येथे एकत्र येण्याचे आवाहन केले आहे.

शेतकऱ्यांच्या जेलभरो आंदोलनात सहभागी होण्यासाठी बेळगावकडे येत असताना गोकाकचे डीवायएसपी नायक यांच्या नेतृत्वाखालील पोलिसांनी शशिकांत गुरूजी यांना वाटेतच रोखून ताब्यात घेतले होते. चुन्नाप्पा पुजारी यांच्यासह अनेक शेतकरी नेत्यांनाही खबरदारीचा उपाय म्हणून ताब्यात घेण्यात आले होते. आता सुटका झाल्यानंतर गुरूजी यांनी राज्यातील सर्व शेतकरी आणि नेत्यांनी एकाच व्यासपीठावर एकत्र येण्याचे आवाहन केले आहे.

आज सायंकाळी गुर्लापूर येथील व्यासपीठावर उपस्थित राहावे, असे त्यांनी म्हटले आहे. या बैठकीत शेतकरी आंदोलनाची पुढील दिशा आणि महत्त्वाचे निर्णय घेतले जाणार असल्याचेही शशिकांत गुरूजी यांनी स्पष्ट केले.