बेळगाव जिल्ह्यात सर्वाधिक रक्तसंकलन करण्याचे श्रेय हुक्केरी तालुक्यातील बस्सापूर येथील वरिष्ठ प्रयोगशाळा तंत्रज्ञ किरण सवदत्ती यांना जाते, असे प्रतिपादन हुक्केरी तालुका आरोग्य अधिकारी डॉ. उदय कुडची यांनी केले.

गेल्या २६ वर्षांपासून हुक्केरी तालुक्यातील दुर्गम भागातील इस्लामपूर आणि बस्सापूर प्राथमिक आरोग्य केंद्रात सेवा बजावून आता कित्तूर तालुक्यात पदोन्नतीने बदली झालेल्या प्रयोगशाळा तंत्रज्ञ किरण सवदत्ती यांचा निरोप समारंभ पार पडला. बेळगाव जिल्हा सर्वेक्षण अधिकारी आर. आर. अंतिम यांच्या अध्यक्षतेखाली झालेल्या या समारंभात मंत्री सतीश जारकीहोळी यांचे वैयक्तिक सहाय्यक जंगलीसाम नाईक यांनी किरण सवदत्ती यांनी आरोग्य विभागाच्या योजना गरीब जनतेपर्यंत पोहोचवण्याचे प्रामाणिक काम केल्याचे सांगत त्यांच्या भविष्यासाठी शुभेच्छा दिल्या.

त्यानंतर बस्सापूर प्राथमिक आरोग्य केंद्राच्या वैद्यकीय अधिकारी साक्षी मोटेकर व कर्मचाऱ्यांनी सवदत्ती दांपत्याचा सत्कार केला. हुक्केरी तालुका आरोग्य अधिकारी डॉ. उदय कुडची यांनी पत्रकारांशी बोलताना दुर्गम भागात विशेष रक्तदान शिबिरे आयोजित करून जिल्ह्यात सर्वाधिक रक्तसंकलन करण्याचे श्रेय किरण सवदत्ती यांना दिल्याचे सांगितले.

त्यानंतर जिल्ह्यातील विविध भागांतून आलेले आरोग्य अधिकारी, चाहते आणि ग्रामस्थांनी सवदत्ती यांचा सत्कार करून त्यांना निरोप दिला.

बस्सापूर आरोग्य केंद्र सातत्याने प्रसूती रुग्णालय करण्याचा माझा ध्यास होता, मात्र आता माझी बदली झाली आहे. या प्रदीर्घ सेवाकाळात सहकार्य करणाऱ्या अधिकारी, नेते आणि ग्रामस्थांचा मी आभारी आहे, अशी प्रतिक्रिया किरण सवदत्ती यांनी दिली.

यावेळी दीपा कुंदगोळ, शिवानंद वारीमणी, राजुगौडा पाटील, राजू बेण्णी, भिमाशी मळ्ळीमनी, मंजुनाथ बिसनळ्ळी, ईरण्णा जोंड, गजानन पाटील आणि आशा व अंगणवाडी कार्यकर्त्या उपस्थित होत्या.

राजू बागलकोटे
इन न्यूज, हुक्केरी