येत्या २० ऑगस्ट रोजी दिवंगत डी. देवराज अरस यांची १११ वी जयंती उत्साहात साजरी करूया, असे आवाहन हुक्केरी तालुका मागासवर्गीय कल्याण अधिकारी के. बी. देवलापूर यांनी केले.

मागासवर्गीयांचे नेते डी. देवराज अरस यांची जयंती २० ऑगस्ट रोजी साजरी करण्यासाठी तहसीलदार बलराम कट्टीमनी यांच्या अध्यक्षतेखाली पूर्वतयारी बैठक पार पडली. मागासवर्गीय कल्याण अधिकारी के. बी. देवलापूर यांनी सांगितले की, दरवर्षीप्रमाणे यंदाही वसतिगृहात शिकणाऱ्या गुणवंत विद्यार्थ्यांचा सत्कार करण्यात येईल. तसेच तज्ज्ञ वक्त्यांचे व्याख्यान आयोजित करून हा कार्यक्रम उत्साहात पार पाडला जाईल, असे के. बी. देवलापूर यांनी म्हटले.

यावेळी व्यासपीठावर तहसीलदार बलराम कट्टीमनी, तालुका पंचायत कार्यकारी अधिकारी टी. आर. मल्लाडद, कृषी विभागाचे सहाय्यक संचालक महादेव पटगुंदी उपस्थित होते.

या प्रसंगी सरकारी कर्मचारी संघाचे अध्यक्ष अविनाश होळेप्पगोळ, समाजकल्याण अधिकारी गुरुशांत पावटे, महसूल अधिकारी मल्लिकार्जुन सारापुरे, ट्रेझरी अधिकारी सुभाष झंडेनावर, फलोत्पादन अधिकारी एम. एस. कळ्ळीमनी आदी मान्यवर उपस्थित होते.

राजू बागलकोटी
इन न्यूज
हुक्केरी