बैलहोंगल येथे मलप्रभा नदीत आत्महत्येच्या उद्देशाने उडी घेतलेल्या एका तरुणीचा जीव सर्पमित्र व समाजसेवक मल्लिकार्जुन गाणिगेर यांनी स्वतःचा जीव धोक्यात घालून वाचवला.

नयानगर जवळील मलप्रभा नदीच्या पुलावरून एका तरुणीने नदीत उडी घेतल्याचे पाहून स्थानिकांमध्ये घबराट पसरली. पाण्याचा प्रवाह तीव्र असल्याने कोणीही नदीत उतरण्याचे धाडस दाखवले नाही.

घटनेची माहिती मिळताच मल्लिकार्जुन गाणिगेर यांनी तत्काळ घटनास्थळी धाव घेतली आणि कोणताही विचार न करता नदीत उडी घेऊन बुडणाऱ्या तरुणीला सुखरूप बाहेर काढले. प्राथमिक उपचारानंतर तिला पोलीस ठाण्यात नेण्यात आले.

गाणिगेर यांच्या शौर्याचे आणि प्रसंगावधानाचे कौतुक करत असे समाजसेवक समाजासाठी आदर्श असल्याचे पोलीस निरीक्षक प्रमोद यलीगार यांनी सांगितले.

मल्लिकार्जुन गाणिगेर यांच्या प्रसंगावधान आणि धाडसामुळे एका तरुणीचे प्राण वाचल्याने उपस्थितांनी त्यांच्या कार्याचे कौतुक केले.