बागलकोट जिल्ह्यातील बिळगी तालुक्यात भटक्या कुत्र्यांनी धुमाकूळ घातला आहे. गोविनदिन्नी गावात कुत्र्यांच्या एका टोळीने केलेल्या हल्ल्यात २० मेंढ्यांचा मृत्यू झाला असून, यामुळे एका गरीब शेतकऱ्याचे मोठे आर्थिक नुकसान झाले आहे.

बिळगी तालुक्यातील गोविनदिन्नी पुनर्वसन केंद्रातील रहिवासी बसवराज बुगडी यांच्या मेंढ्यांच्या गोठ्यावर शनिवारी मध्यरात्री हा काळाने घाला घातला. सुमारे ८ ते १० भटक्या कुत्र्यांच्या टोळीने अचानक गोठ्यात घुसून मेंढ्यांच्या नरडीचा घोट घेतला. या हल्ल्यात २० मेंढ्या जागीच ठार झाल्या असून, ३ कोकरे गंभीर जखमी आहेत.

आपल्या संसाराचा गाडा हाकण्यासाठी पोटच्या पोरासारख्या पाळलेल्या ३ लाख रुपये किमतीच्या मेंढ्या गमावल्यामुळे बसवराज बुगडी यांना मोठा धक्का बसला आहे. या घटनेची माहिती मिळताच पशुसंवर्धन विभागाच्या अधिकाऱ्यांनी घटनास्थळी धाव घेऊन पाहणी केली. जिल्ह्यात भटक्या कुत्र्यांचा सुळसुळाट वाढूनही प्रशासन ढिम्म असल्याची टीका ग्रामस्थांनी केली असून, पीडित शेतकऱ्याला तातडीने सरकारी मदत देण्याची मागणी केली जात आहे.