सैदापूर येथील गोदावरी साखर कारखान्यात झालेल्या दगडफेक आणि ट्रॅक्टर जाळपोळ प्रकरणासंदर्भात साखर मंत्री शिवानंद पाटील आणि बागलकोट जिल्ह्याचे पालक मंत्री आर. बी. तिम्मापूर यांनी संयुक्त निवेदन दिले आहे. ही घटना “शेतकऱ्यांच्या नावाखाली समाजकंटकांनी केलेले कृत्य” असल्याचा आरोप दोन्ही मंत्र्यांनी केला आहे.

बागलकोट जिल्ह्यातील महालिंगपूरजवळील सैदापूर येथील गोदावरी साखर कारखान्यात झालेल्या दुर्दैवी घटनेवर साखर मंत्री शिवानंद पाटील आणि बागलकोटचे पालक मंत्री आर. बी. तिम्मापूर यांनी संयुक्त वक्तव्य जारी केले. ही घटना “शेतकऱ्यांच्या नावाखाली समाजकंटकांनी केलेले कृत्य” आहे, असा आरोप मंत्र्यांनी केला. नुकसान झालेल्या शेतकऱ्यांना सरकारकडून योग्य ती भरपाई दिली जाईल, असे आश्वासनही त्यांनी दिले. राज्यात ७ कोटी ३० लाख मेट्रिक टन उसाचे गाळप व्हायचे असून, हे गाळप तातडीने सुरू होणे आवश्यक आहे. त्यामुळे, शेतकऱ्यांनी स्वयंस्फूर्तीने कारखान्यांकडे ऊस पाठवावा, असे आवाहन मंत्र्यांनी केले. सैदापूर कारखान्यात काही समस्या निर्माण झाल्याबद्दल मंत्र्यांनी खेद व्यक्त केला आणि दोषींवर कठोर कारवाई करण्याचे आश्वासन दिले.

जिल्हा पालक मंत्री आर. बी. तिम्मापूर यांनी, उसाच्या दरासंदर्भात कोणताही संकोच न बाळगता कारखान्यांच्या मालकांनी तातडीने गाळप सुरू करावे, अशी मागणी केली. शेतकरी आंदोलकांनी ३५०० रुपये दराची मागणी केली होती. “सध्या कारखानदार ३२५० रुपये देण्यास तयार झाले आहेत. यासंदर्भात आपण यापूर्वीच चार बैठका घेतल्या असून, आंदोलकांनी सुरुवातीला ३५०० रुपये, नंतर रिकव्हरी नको-एकसमान दर हवा, आणि त्यानंतर ३२५० रुपये एकाच वेळी देण्याची मागणी केली होती. ही चर्चा सुरू असतानाच दुर्दैवी घटना घडली, याचे आम्हाला दुःख आहे,” असे मंत्री शिवानंद पाटील यांनी स्पष्ट केले.