बेळगावमधील उषा कॉलनीतील श्री महालक्ष्मी मंदिरात दसरा महोत्सव भक्तीपूर्ण वातावरणात पार पडला. महोत्सवाच्या समारोपानिमित्त आयोजित विविध धार्मिक विधीनंतर महाप्रसादाचे वाटप पार पडले.

बेळगावमधील बॉक्साइड रोडवरील उषा कॉलनी येथील श्री महालक्ष्मी मंदिर विकास समितीच्या वतीने आयोजित नवरात्रोत्सव अत्यंत उत्साहात संपन्न झाला. धार्मिक विधी आटोपल्यानंतर बुधवारी रात्री हजारो भाविकांना महाप्रसाद वितरित करण्यात आला.

गेल्या 9 दिवसांपासून महाअभिषेक, गणहोम यासह विविध धार्मिक विधींचे आयोजन करण्यात आले होते. हा उत्सव सुरु होऊन 16 वर्षे झाली असून उत्सवाचा भाग म्हणून कारंजी मठाचे गुरुसिद्ध महास्वामीजी यांच्या सान्निध्यात कन्या पूजन पार पडले. तर विजयादशमी रोजी चंडिका होम पूर्णाहुती, शमी पूजा आणि सीमोल्लंघन असे धार्मिक कार्यक्रम पार पडले.

हा सोहळा मुरगोडचे महांत दुरुदुंडीश्वर मठाचे नीलकंठ महास्वामीजी तसेच हुक्केरीच्या गुरुशांतेश्वर संस्थान हिरेमठाचे चंद्रशेखर शिवाचार्य स्वामीजी यांच्या नेतृत्वाखाली झाला.

मंदिर समितीचे अध्यक्ष देवी हिरेमठ, खजिनदार सतीश माळवदे, प्रकाश हेगडे आणि नागेश पाटील यांच्या नेतृत्वाखाली हा महोत्सव यशस्वीरीत्या पार पडला.