विजापूर जिल्ह्यात मान्सून आणि परतीच्या पावसाने दगा दिल्यामुळे कापसाचे पीक पूर्णपणे वाया गेले आहे. पीक हातातून गेल्यामुळे उद्विग्न झालेल्या एका शेतकऱ्याने डोळ्यांत अश्रू आणत कापसाची झाडे उपटून फेकून दिली.

देवराहीप्पडगी तालुक्यातील सातीहाळ येथील शेतकरी शिवप्पा भीमप्पा राजनाळ यांनी तीन एकर शेतात कापसाची लागवड केली होती. बियाणे, खते आणि मजुरीवर मोठा खर्च करूनही पावसाअभावी पीक करपून गेले. हाती काहीच उत्पन्न न आल्याने वैतागलेल्या शेतकऱ्याने कापसाची झाडे उखडून फेकली.

पावसाअभावी कापसाचे मोठे नुकसान झाल्याने शेतकरी आर्थिक अडचणीत सापडले आहेत. त्यामुळे शासनाने बाधित शेतकऱ्यांना तात्काळ नुकसानभरपाई द्यावी, अशी मागणी सातीहाळ परिसरातील शेतकऱ्यांनी केली आहे.