बेळगाव येथील मराठा मंडळ पॉलिटेक्निक कॉलेजमध्ये आयोजित विशेष मोहिमेत शेकडो विद्यार्थ्यांनी ऑनलाईन पद्धतीने नवीन मतदार म्हणून यशस्वी नोंदणी केली.

लोकशाही बळकटीकरणासाठी युवा मतदारांचा सहभाग अत्यंत महत्त्वाचा आहे. याच उद्दिष्टाने बेळगावच्या मराठा मंडळ पॉलिटेक्निक कॉलेजमध्ये नवीन मतदार नोंदणी आणि जनजागृती उपक्रम राबवण्यात आला. यामध्ये विद्यार्थ्यांनी उत्स्फूर्त प्रतिसाद देत डिजिटल माध्यमाद्वारे आपल्या नावांची नोंदणी केली.

बेळगाव महानगरपालिका आणि निवडणूक आयोग यांच्या संयुक्त विद्यमाने २२ सप्टेंबर रोजी या कार्यक्रमाचे आयोजन करण्यात आले होते. या मोहिमेत २०० हून अधिक विद्यार्थ्यांनी सक्रिय सहभाग नोंदवत ऑनलाईन मतदार ओळखपत्रासाठी अर्ज सादर केले.

कार्यक्रमाच्या अध्यक्षस्थानावरून बोलताना कॉलेजचे प्राचार्य आर. एस. सूर्यवंशी आणि विविध विभागांच्या प्रमुखांनी देश उभारणीत युवा मतदानाचे महत्त्व विशद केले. प्रत्येक पात्र युवकाने मतदानाचा हक्क बजावला पाहिजे, असे प्रतिपादन आर. एस. सूर्यवंशी यांनी केले.

एन. एस. एस. समन्वयक जी. के. शिवयोगीमठ आणि विद्यार्थी प्रतिनिधींच्या नेतृत्वाखाली हा संपूर्ण उपक्रम सुलभतेने पार पडला.