बेळगाव तालुक्यातील धामणे येथील डॉ. आंबेडकर नगरात सार्वजनिक गणेश मंडळाच्या वतीने स्थापित करण्यात आलेल्या श्री गणेशाच्या दर्शनासाठी भाविकांनी गर्दी केली होती.

गणेशोत्सवाच्या निमित्ताने संपूर्ण परिसरात भक्तिमय वातावरण निर्माण झाले असून, दर्शनासाठी आलेल्या नागरिकांनी अत्यंत श्रद्धेने बाप्पाचे दर्शन घेऊन आशीर्वाद घेतले.

या उत्सवाचा भाग म्हणून रविवारी सार्वजनिक गणेश मंडळाच्या वतीने भाविक आणि नागरिकांसाठी महाप्रसादाचे वाटप करण्यात आले. या महाप्रसादाचा स्थानिक रहिवासी तसेच परिसरातील भाविकांनी लाभ घेतला.

सार्वजनिक गणेश मंडळाचे अध्यक्ष यल्लाप्पा कावलदार, अर्जुन बास्तवाडकर, शिवप्पा काळशिंगे यांच्यासह मंडळाच्या इतर सदस्यांनी या संपूर्ण कार्यक्रमाचे नियोजन केले. भाविकांची गैरसोय होऊ नये यासाठी मंडळाकडून व्यवस्था करण्यात आली होती.

या धार्मिक कार्यक्रमात स्थानिक नागरिकांचा सहभाग लक्षणीय होता. श्री गणेशाचे दर्शन आणि महाप्रसाद वाटपामुळे परिसरात सौहार्दाचे वातावरण निर्माण झाले असून, स्थानिक रहिवाशांनी मंडळाच्या या उपक्रमाचे स्वागत केले.