शिक्षक दिनाचे औचित्य साधून हुक्केरी तालुक्यात तालुका प्रशासन आणि आरोग्य विभागाच्या वतीने भव्य रक्तदान शिबिराचे आयोजन करण्यात आले. या उपक्रमात सुमारे १७०० नागरिकांनी स्वेच्छेने नोंदणी केली.

तालुक्यातील यमकनमर्डी, संकेश्वर आणि हुक्केरी या तीन केंद्रांवर हे शिबिर आयोजित करण्यात आले होते. संकेश्वर प्राथमिक आरोग्य केंद्रात मुख्य वैद्यकीय अधिकारी डॉ. पूर्णिमा तल्लूर यांच्या हस्ते शिबिराचे उद्घाटन करण्यात आले. हुक्केरीत तहसीलदार बळराम कट्टीमणी यांनी भेट देऊन पाहणी केली आणि रक्तदात्यांना प्रमाणपत्रे दिली.

जिल्हा पंचायतीच्या आदेशानुसार शिक्षण आणि आरोग्य विभागाच्या सहकार्याने या शिबिराचे उत्तम नियोजन करण्यात आल्याची माहिती डॉ. पूर्णिमा तल्लूर यांनी दिली.

तालुका पंचायत कार्यकारी अधिकारी टी. आर. मल्लादड यांच्या नेतृत्वाखाली केएलई आणि बिम्स रुग्णालयाच्या वैद्यकीय पथकाने ६०० युनिट रक्ताचे संकलन केले. शिक्षक दिनानिमित्त गुरुजनांप्रती कृतज्ञता व्यक्त करण्यासाठी हा सामाजिक उपक्रम राबवण्यात आल्याचे तालुका आरोग्य अधिकारी डॉ. उदय कुडची यांनी म्हटले.

या वेळी स्थानिक लोकप्रतिनिधी, आरोग्य अधिकारी डॉ. चेतन कंकणवाडी, डॉ. दत्तात्रय दोडमणी, डॉ. बाबासाहेब पाटील यांच्यासह विविध खात्यांचे अधिकारी उपस्थित होते.