बी. नागेंद्र मंत्री होण्यापूर्वीच सीबीआयने त्यांच्याविरोधात आरोपपत्र दाखल करण्यासाठी राज्यपालांकडे रीतसर परवानगी मागितली होती, असा दावा केंद्रीय मंत्री प्रल्हाद जोशी यांनी केला आहे.

धारवाड येथे प्रसारमाध्यमांशी बोलताना प्रल्हाद जोशी यांनी काँग्रेस सरकारवर तीव्र निशाणा साधला.
माजी मंत्री बी. नागेंद्र यांच्यावर भ्रष्टाचाराचे गंभीर आरोप असूनही त्यांना पुन्हा मंत्रिमंडळात स्थान देण्यात आले आहे. मंत्रिमंडळ विस्तारामागे मोठा आर्थिक गैरव्यवहार झाल्याचा आरोप विरोधकांनी केला असून, काँग्रेसमध्ये थोडीजरी नैतिकता शिल्लक असेल तर त्यांनी नागेंद्र यांची तात्काळ मंत्रिमंडळातून हकालपट्टी करावी, अशी मागणी त्यांनी केली.

कर्नाटक लोकसेवा आयोगातील (केपीएससी) अध्यक्षांच्या निलंबनाबाबत बोलताना, या संस्थेत मोठ्या प्रमाणावर भ्रष्टाचार होत असल्याचा इशारा आधीच दिला होता, याकडे जोशी यांनी लक्ष वेधले. काँग्रेस सरकारने सुरुवातीला याकडे दुर्लक्ष केले असले तरी, उशिरा का होईना आता कारवाई केली आहे. या संस्थेची स्वायत्तता अबाधित ठेवण्यासाठी कठोर पावले उचलणे गरजेचे असल्याचे त्यांनी स्पष्ट केले.

काँग्रेसच्या काही नेत्यांकडून ‘वंदे मातरम’ला होणाऱ्या विरोधावर भाष्य करताना जोशी म्हणाले की, केवळ तुष्टीकरण आणि मतपेढीच्या राजकारणासाठी काँग्रेस या पातळीवर जात आहे. संसदेत कायदा झाला असतानाही असा विरोध करणे अयोग्य असून, वंदे मातरम गात प्राणांची आहुती देणाऱ्या स्वातंत्र्यसैनिकांचा हा अपमान आहे. भूतकाळात ‘तुकडे तुकडे’ घोषणा देणाऱ्यांना पाठिंबा देऊन देशात विभाजनाचे राजकारण करणाऱ्या काँग्रेसची हीच खरी भूमिका असल्याचे त्यांनी नमूद केले. तसेच, स्वातंत्र्यदिनी ‘वंदे मातरम’च्या वेळी झालेल्या प्रकारावरून लक्ष हटवण्यासाठी राहुल गांधी पोलिसांसमोर नाट्य उभे करत असल्याचा टोलाही त्यांनी लगावला.