खानापूर तालुक्यातील गांधिगवाड गावचे रहिवासी आणि हिरेअंग्रोळी सरकारी कन्नड शाळेचे मुख्याध्यापक साधिकली हुसेनसाब बागवान यांचा सेवानिवृत्ती निमित्त सत्कार करण्यात आला.

इटगी येथील गणेश कल्याण मंडपामध्ये शिक्षक संघ, कुटुंबीय, ग्रामस्थ आणि विद्यार्थ्यांच्या वतीने त्यांच्या निवृत्तीपर आयोजित सत्कार समारंभाचे उद्घाटन आमदार विठ्ठल हलगेकर यांनी दीपप्रज्वलन करून केले. शिक्षक पेशा अत्यंत पवित्र असून साधिकली बागवान यांनी ज्ञानदान करून शेकडो विद्यार्थ्यांचे भविष्य घडवले आहे, असे प्रतिपादन आमदार विठ्ठल हलगेकर यांनी केले. तर विद्यार्थ्यांचे यश हाच शिक्षकाचा खरा बहुमान असतो, असे मत निवृत्त प्राध्यापक पी. वाय. पाटील यांनी व्यक्त केले.

साधिकली बागवान यांच्या प्रामाणिक आणि निष्कलंक सेवेचा शिक्षण अधिकारी महादेव मेदार, भाजप नेते बसवराज सानिकोप्प आणि सीपीआय मंजुनाथ हिरेमठ यांनी गौरव केला. तसेच बागवान यांच्या पत्नी शरपुन्निसा या कोणतीही अपेक्षा न ठेवता मोफत धार्मिक शिक्षण देऊन समाजात योगदान देत असल्याचा उल्लेख त्यांचे बंधू नजीर बागवान यांनी केला.

या कार्यक्रमाच्या अध्यक्षस्थानी राजू घोषानेट्टी होते. सोहळ्याला मृत्युंजय महास्वामी, चन्नಬಸವ देव आणि यासीन मौलाना यांचे आशीर्वाद लाभले. याप्रसंगी नागेश मादीगर, मंजुनाथ शेटನ್ನवर, नाशीर बागवान, गौस बागवान, आर. सी. पाटील, एस. जी. कुलकर्णी यांच्यासह स्थानिक लोकप्रतिनिधी, शिक्षक आणि ग्रामस्थ उपस्थित होते. सोहळ्याच्या शेवटी शिक्षक वृंद व चाहत्यांच्या वतीने बागवान दांपत्याचा सत्कार करण्यात आला.