बागलकोट जिल्ह्यातील मुधोळ तालुक्यातील लोकापूर शहरात सततच्या पावसामुळे एका घराचे छप्पर कोसळले. सुदैवाने यात कोणतीही जीवितहानी झाली नाही आणि कुटुंबातील सदस्य थोडक्यात बचावले.

लोकापूर शहराच्या वॉर्ड क्रमांक १ मधील रुक्मिणी पेटकर यांच्या घराची ही घटना आहे. रात्री सुमारे ८ वाजता ही दुर्घटना घडली. ज्या भागात कुटुंब झोपते त्याच ठिकाणी छप्पर कोसळले, पण वेळीच धोक्याची जाणीव झाल्यामुळे कुटुंबातील सदस्य बाहेर आले. त्यामुळे मोठा अनर्थ टळला. सतत कोसळणाऱ्या पावसामुळे ही घटना घडल्याचे सांगण्यात येत आहे. यामुळे घराचे मोठ्या प्रमाणात नुकसान झाले आहे. घटनेची माहिती मिळताच प्रशासकीय अधिकाऱ्यांनी घटनास्थळी भेट देऊन पाहणी केली.