बेंगळुर कृषी विद्यापीठाच्या वतीने 17 नोव्हेंबर ते 20 नोव्हेंबर दरम्यान कृषी मेळावा आयोजित केला आहे. मुख्यमंत्री सिद्धरामय्या यांनी आज या मेळाव्याचे उद्घाटन केले. कृषी मेळाव्याच्या उद्घाटन सोहळ्यापूर्वी मुख्यमंत्र्यांनी पीक प्रात्यक्षिकांच्या प्रदर्शन स्टॉलला भेट देऊन शेतकऱ्यांशी संवाद साधला.

‘अन्न-आरोग्य-उत्पन्नासाठी तृणधान्ये’ हे घोषवाक्य घेऊन यंदाचा कृषी मेळा बेंगळूरच्या गांधी कृषी विज्ञान केंद्राच्या प्रांगणात आयोजित करण्यात आला आहे. याशिवाय, कृषी विद्यापीठाने संशोधित आणि विकसित केलेल्या लाल देठांसह लाल फणसाच्या जातीचे सादरीकरण या कृषी मेळाव्यात करण्यात आले.

यावेळी मुख्यमंत्री सिद्धरामय्या यांनी पाच उत्कृष्ट शेतकऱ्यांना राज्यस्तरीय ‘कृषी पुरस्कार’ प्रदान केले. समारंभात उपमुख्यमंत्री डी. के. शिवकुमार, कृषी मंत्री चेलुवरायस्वामी, आमदार शरद बच्चेगौडा, कृषी विद्यापीठाचे कुलगुरु डॉ. एन. व्ही. सुरेश आदी मान्यवर उपस्थित होते.