बेळगावातील वंटमुरी येथे महिलेला विवस्त्र करून खांबाला बांधून मारहाण केल्याप्रकरणाची गंभीर दखल घेत महिला व बालकल्याण विभागाच्या मंत्री लक्ष्मी हेब्बाळकर यांनी रुग्णालयात दाखल झालेल्या पीडित महिलेची भेट घेऊन तिच्या प्रकृतीची विचारपूस केली.

पीडित महिलेला बेळगावच्या बीम्स रुग्णालयात दाखल करण्यात आले असून, तिच्यावर उपचार सुरू आहेत. मंत्री लक्ष्मी हेब्बाळकर यांनी रुग्णालयात जाऊन त्या महिलेच्या प्रकृतीची विचारपूस करून तिला धीर दिला.

यावेळी बोलताना मंत्री लक्ष्मी हेब्बाळकर म्हणाल्या की, संपूर्ण मानव जातीला काळिमा फासणारी ही घटना आहे. माझ्या तालुक्यात अशी घटना घडणे खरोखरच दुर्दैवी आहे. दोषींवर कडक कारवाई होईल. समाजात अशा घटना पुन्हा घडू नयेत. पोलिसांनी यापूर्वीच सात आरोपींना अटक केली असून सरकारने हे प्रकरण गांभीर्याने घेतले आहे. आरोपींना कायद्याच्या चौकटीत राहून कठोरात कठोर शिक्षा झाली पाहिजे.

माझ्या जिल्ह्यात अशी घटना घडणे ही धक्कादायक घटना असून, आरोपींना शिक्षा व्हावी, अशी विनंतीही मी गृहमंत्र्यांना करत आहे. या घटनेमुळे पीडित महिला घाबरली आहे. शिष्टाचाराचा प्रश्न विचारल्यावर मुली स्वाभाविकपणे घाबरतात. मी त्यांना धीर दिला की आमचे सरकार आणि मी त्यांच्यासोबत आहोत. अशा घटना पुन्हा घडू नयेत यासाठी ‘सखी वन’ कर्मचाऱ्यांची नियुक्ती करण्यात आल्याचे त्यांनी सांगितले.