कर्नाटक विधीमंडळाचे हिवाळी अधिवेशन डिसेंबरच्या पहिल्या आठवड्यात सुवर्ण विधानसौधमध्ये होणार आहे. पण त्याची अधिकृत तारीख मुख्यमंत्री सिद्दरामय्या जाहीर करतील अशी माहिती विधानसभेचे अध्यक्ष यू. टी. खादर आणि विधान परिषदेचे सभापती बसवराज होरट्टी यांनी दिली.

विधिमंडळाच्या हिवाळी अधिवेशनाच्या पार्श्वभूमीवर विधान परिषदेचे सभापती बसवराज होरट्टी आणि विधानसभा अध्यक्ष यू. टी. खादर यांनी मंगळवारी सुवर्ण विधानसौधला भेट देऊन पाहणी केली. दोन्ही नेत्यांनी विधानसभा आणि विधान परिषद सभागृह, बँक्वेट हॉल, सेंट्रल हॉलसह विविध कक्षांची पाहणी करून माहिती घेतली.

त्यानंतर घेतलेल्या पत्रकार परिषदेत बोलताना विधानसभेचे अध्यक्ष यू. टी. खादर यांनी सांगितले की, हिवाळी अधिवेशन नीट व यशस्वीपणे पार पडावे, या दृष्टीने तयारी सुरू झाली आहे. अधिवेशनाचे आयोजन नीटनेटके व योग्य प्रकारे करण्यासाठी सर्व व्यवस्था करण्यात येईल. आम्ही बेंगळूरला जाऊन मुख्यमंत्र्यांसोबत चर्चा करू. त्यानंतर पुन्हा बेळगावला येऊन अधिवेशनाची अधिकृत तारीख जाहीर करू. याबाबत एक विशेष बैठक घेणार आहोत.

अधिवेशन पाहण्यासाठी येणारे लोक व शाळकरी मुलांना पास देण्याची व्यवस्था करण्यात आली आहे. त्यांच्यासाठी आसनव्यवस्था, जाण्या-येण्याचे वेगळे मार्ग आदी व्यवस्था करण्यात येईल. त्याचप्रमाणे चोख सुरक्षाव्यवस्था ठेवण्यात येणार आहे. एकूणच अधिवेशन सुरळीत पार पडण्यासाठी मी व विधान परिषद सभापती बसवराज होरट्टी मिळून चर्चा केली आहे असे खादर यांनी सांगितले.

डिसेंबरच्या पहिल्या आठवड्यात बेळगावात हिवाळी अधिवेशन होणार आहे. सीएम सिद्धरामय्या अधिवेशनाच्या अधिकृत तारखेची घोषणा करतील. 4 डिसेंबरपासून हे अधिवेशन अनौपचारिकपणे होणार आहे. परंतु सरकारने अद्यापपर्यंत आम्हाला अधिकृतपणे तारीख कळवली नाही. अधिवेशन अर्थपूर्ण व्हावे म्हणजे विरोध कमी व्हावा. बेळगाव अधिवेशन म्हणजे आंदोलनच असा आमदारांचा समज झाला आहे. त्यामुळे आंदोलने कमी झाली पाहिजेत. त्यामुळे शेतकऱ्यांचे प्रश्न सोडवण्यासाठी संबंधित मंत्र्यांना सांगू, असे विधान परिषद सभापती बसवराज होरट्टी यांनी सांगितले.

हिवाळी अधिवेशनाच्या तयारीचा आम्ही आढावा घेतला. अधिवेशनादरम्यान आम्ही उत्तर कर्नाटकातील लोकांची विशेष काळजी घेणार आहोत. अधिवेशनासाठी येणारे मुख्यमंत्री, मंत्री, आमदार आणि अधिकारी यांना सर्व सुविधा पुरविल्या जातील. शालेय मुलांना सत्र पाहण्यासाठी विशेष पासची व्यवस्था करण्यात येणार आहे असे ते म्हणाले.

बेळगावातील अधिवेशन अर्थपूर्ण व्हायचे असेल तर आंदोलने कमी झाली पाहिजेत. बेळगाव अधिवेशन म्हटले की आंदोलनेच असे आमच्या आमदारांना वाटू लागले आहे. आंदोलने कमी करायची असतील तर शेतकऱ्यांच्या समस्या सोडवायला हव्यात. याबाबत संबंधित मंत्र्यांना सांगणार असल्याचे त्यांनी सांगितले.
या संयुक्त पत्रकार परिषदेला आमदार राजू सेठ, जिल्हाधिकारी नितेश पाटील, आयुक्त सिद्रामप्पा, प्रशिक्षणार्थी आयएएस अधिकारी शुभम शुक्ला, जिल्हा पंचायत सीईओ हर्षल भोयर आदी अधिकारी उपस्थित होते.