विजापूर जिल्ह्यातील सिंदगी शहरात सार्वजनिक गणेशोत्सवानिमित्त उभारलेला अलंकृत सुवर्ण गणेश मंडप कोसळल्याची घटना घडली. यात काही जण जखमी झाले असून त्यांच्यावर उपचार सुरु आहेत.

सिंदगी शहरातील स्वामी विवेकानंद सर्कल येथील गणेश मंडप कोसळल्याने काही जण जखमी झाले.  सार्वजनिक गणेशोत्सवाच्या पार्श्वभूमीवर सिंदगी शहरातील स्वामी विवेकानंद सर्कल येथे वेल्लोरच्या सुवर्णमंदिराची प्रतिकृती उभारण्यात आली होती. वेल्लोर देवस्थानच्या या प्रतिकृतीने संपूर्ण सिंदगी शहरवासियांचे लक्ष वेधून घेतले. चार दिवसांपूर्वी येथे स्थापन झालेल्या सुवर्ण गणेश मंदिरात दररोज शेकडो लोक येत आहेत.

नेहमीप्रमाणे चौथ्या दिवशीही अनेक गणेशभक्तांचे आगमन झाले. मात्र, सायंकाळी हा गणेश मंडप अचानक कोसळला. मोठ्या प्रमाणात लोक जमले हे मंडप कोसळण्याचे कारण असल्याचे सांगितले जात आहे. लहान मुले, महिला आणि तरुण मंडपात गणेशाचे दर्शन घेण्यासाठी थांबले असताना मंडपाचा मध्यभाग अचानक कोसळला. मंडपातील लोकांच्या अंगावर हा भाग पडल्याने काहींनी तत्काळ हाताने मंडप चारीबाजुंनी उचलला त्यामुळे सुदैवाने मोठा अनर्थ टळला.

ही घटना घडली तेव्हा माणसं नसती तर दर्शनासाठी उभ्या असलेल्या लोकांना गंभीर इजा झाली असती. या अपघातात मुलांच्या हाताला, पायाला आणि डोक्याला दुखापत झाली आहे. काही महिला व तरुणांच्या डोक्याला व अंगावर दुखापत झाल्याची माहिती प्रत्यक्षदर्शींनी दिली आहे. घटनेनंतर जखमींना उपचारासाठी स्वामी विवेकानंद सर्कलजवळील खासगी रुग्णालयात दाखल करण्यात आले.