देशात पुन्हा एकदा कोरोनाची भीती सतावू लागली आहे. सर्वाधिक रुग्ण महाराष्ट्र आणि केरळमधून येत आहेत. महाराष्ट्रात 24 तासांत 2701 नवीन रुग्ण आढळले असून, 17 फेब्रुवारीनंतरचा हा उच्चांक आहे. तरीही बेळगाव जिल्हा प्रशासन ढिम्म असून महाराष्ट्रातून कर्नाटकात येणाऱ्यांचा मुक्त प्रवास सुरु आहे.

17 फेब्रुवारी रोजी 2,797 संक्रमित आढळले. त्याच वेळी, मंगळवारी (7 जून) येथे 1821 रुग्ण पॉझिटिव्ह आढळले. अशाप्रकारे बुधवारी महाराष्ट्रात 44 टक्के रुग्णसंख्या वाढली. एकट्या मुंबईत 1765 बाधित आढळले, जे या वर्षीच्या जानेवारीनंतरचे सर्वाधिक आहे. मुंबईत इस्पितळात दाखल होणाऱ्या रुग्णांच्या संख्येतही वाढ झाली आहे. गेल्या 24 तासांत महाराष्ट्रात 1327 रुग्णांना डिस्चार्ज देण्यात आला आहे. सुदैवाने एकही मृत्यू झालेला नाही. सध्या येथे 9806 रुग्णांवर उपचार सुरू आहेत.

संपूर्ण महाराष्ट्रात सकारात्मकता दर 6.48% आहे. दरम्यान, महाराष्ट्राच्या सीमेला लागून असलेल्या बेळगाव जिल्ह्यात खबरदारी घेण्याची गरज वाढली आहे. राज्य सरकारने जिल्हा प्रशासनाला वेळीच सतर्क न केल्यास सीमाभागात कोविड पुन्हा डोके वर काढेल यात शंका नाही.