छत्रपती शिवरायांच्या जीवनावर आधारित शिवसृष्टी निर्मितीचे कामकाज पूर्णत्वास आले असून एप्रिल अखेर उत्तर प्रदेशचे मुख्यमंत्री योगी आदित्यनाथ यांच्याहस्ते उद्घाटन करण्यात येणार असल्याची माहिती आमदार अभय पाटील यांनी दिली आहे.

बेळगावमध्ये पत्रकारांशी बोलताना आमदार अभय पाटील म्हणाले, बेळगावमधील शिवसृष्टी हे आपले ड्रीम प्रोजेक्त आहे. छत्रपती शिवरायांच्या जीवनावर आधारित निर्माण करण्यात आलेल्या या कामकाजाची सुरुवात झाली. सुमारे १० कोटी रुपयांच्या खर्चातून हि शिवसृष्टी साकारण्यात आली असून एप्रिल महिन्याच्या अखेरीस याचे उद्घाटन उत्तर प्रदेशचे मुख्यमंत्री योगी आदित्यनाथ यांच्याहस्ते करण्याचा विचार आहे. यासंदर्भात लखनौ येथे त्यांची भेट घेण्यात आली असून उद्घाटनाची तारीख ठरविण्यात येत असल्याचे अभय पाटील यांनी सांगितले.

मुख्यमंत्र्यांवर माजी मुख्यमंत्री एच डी कुमारस्वामी यांनी केलेल्या वक्तव्याबाबत प्रतिक्रिया देताना आमदार अभय पाटील म्हणाले, हल्ली मुख्यमंत्र्यांसंदर्भात होत असलेली अवमानकारक वक्तव्ये हि निषेधार्थ आहेत. मुख्यमंत्र्यांवर कोणतेही भ्रष्टाचाराचे आरोप नसल्याचेही आमदार अभय पाटील म्हणाले.

एकंदरीत बेळगावमधील बहुचर्चित, बहुप्रतीक्षित असलेली शिवसृष्टी अखेर बेळगावकरांसाठी उपलब्ध होणार आहे. बऱ्याच कालावधीपासून प्रलंबित असलेल्या शिवसृष्टीचा अखेर उदघाटनाची मुहूर्त काढण्यात येत असून बेळगावमधील समस्त शिवप्रेमींसाठी हि पर्वणी ठरणार आहे.