आपल्या लाडक्या “मायमराठी’ने सोशल मीडियावर सर्वाधिक वापरली जाणारी भाषा म्हणून झेंडा रोवला आहे. हिंदीसह अन्य प्रादेशिक भाषांना मागे टाकत व्हॉट्सअप, यूट्यूब आणि फेसबुकचे विश्व मराठी भाषेतल्या पोस्ट आणि व्हिडिओने व्यापले आहे.

देशभरात ८ कोटी ३० लाख लोकांची मातृभाषा मराठी आहे. यापैकी ५.१ कोटी लोक म्हणजेच ६३.७५% लोक सोशल मीडियावर मराठीचा वापर करतात. दुसऱ्या क्रमांकावर हिंदीचा नंबर लागतो. देशभरात ५२ कोटी ८३ लाख लोक हिंदी भाषेचा मातृभाषा म्हणून वापर करतात. त्यापैकी २० कोटी लोक म्हणजेच ३८.६५% लोक सोशल मीडियावर हिंदीतून संवाद साधतात.

केंद्रीय इलेक्ट्रॉनिक्स व माहिती तंत्रज्ञान खात्यानुसार, लॉकडाऊनच्या काळात देशात डिजिटल साक्षरतेत मोठी वाढ झाली. २०२१ मध्ये देशभरात व्हॉट्सअप वापरणाऱ्यांची संख्या ५३ कोटी, यूट्यूब-४४.८ कोटी, फेसबुक-४१ कोटी, इन्स्टाग्राम- २१ कोटी, तर ट्विटर वापरकर्ते १.५ कोटीच्या घरात आहेत.

व्हॉइस टायपिंग वाढले

मराठीसह अन्य प्रादेशिक भाषांत मोबाइलवर ६० टक्के लोकांना ऑपरेटरकडून अडचणी सोडवण्यासाठी सहकार्य मिळत नसल्याची तक्रार आहे. सर्वाधिक ८० टक्के लोकांना की-बोर्डची तक्रार आहे. इंग्रजीत टाइप करून मराठी भाषा लिहिणे कठीण जाते. शहरी भागात अनेक जण व्हॉइस टायपिंगकडे वळले आहेत. व्हॉइस कमांडचा वापर करून गाणी, सिनेमा शोधले जातात.

पाच वर्षांत दुपटीहून अधिक वाढ

गुगल-केपीएमजी सर्वेक्षणानुसार, ५ वर्षांत सोशल मीडियावर इंग्रजी भाषेचा वापर करणाऱ्यांची संख्या १२%नी वाढली आहे.

याच ५ वर्षांत प्रादेशिक भाषेचा वापर करणारे १२० टक्क्यांनी वाढले. ही वाढ वर्षाला १८ टक्केप्रमाणे झाली.

दहा वर्षांत सोशल मीडियावर देवनागरी वापरणारे ५ पटीने वाढले

९ भाषांना मागे टाकत मराठीचा डंका !

राज्याच्या लोकसंख्येच्या अर्धा हिस्सा म्हणजेच सुमारे ५.१ कोटी मराठी माणूस सोशल मीडियावर मराठीचाच वापर करतो. दुसरीकडे १२ राज्यात हिंदी बोलली जात असतानाही केवळ ३८.६५%लोक सोशल मीडियावर हिंदीचा वापर करतात.

जर्मनीच्या ४ विद्यापीठांत मराठीचे वर्ग

चार ऑटोमोबाइल कंपन्या महाराष्ट्रात असल्याने गेल्या २० वर्षांत जर्मनीच्या ४ विद्यापीठांत मराठीचे वर्ग सुरू झाले आहेत. जर्मनीत लावणीचेही वर्ग आहेत. न्यूझीलंड, सिडनी, यूएईतही मराठीचे वर्ग चालतात.

भाषा संचालनालयाने मराठीतील पर्यायी इंग्रजी शब्दांच्या शासन शब्दकोशाचे मोबाइल अ‍ॅप तयार केले आहे. शासन शब्दकोश भाग-एक मध्ये निवडक शब्दकोशातील ७२,१७१ पर्यायी शब्दांचा समावेश आहे.