बेळगावच्या जिल्हा क्रीडांगणावर आयोजित ७१ व्या कर्नाटक राज्योत्सव सोहळ्यात साहित्य आणि शिक्षण क्षेत्रातील उल्लेखनीय योगदानाबद्दल निवृत्त मुख्याध्यापक ए. ए. सनदी यांना जिल्हास्तरीय राज्योत्सव पुरस्कार देऊन गौरविण्यात आले. जिल्हा पालकमंत्री सतीश जारकीहोळी यांच्या हस्ते त्यांना हा प्रतिष्ठेचा पुरस्कार प्रदान करण्यात आला.

बेळगावमधील भरतेश हायस्कूलचे निवृत्त मुख्याध्यापक असलेले आणि शिंदोळी गावचे रहिवासी ए. ए. सनदी यांनी साहित्य क्षेत्रात मोलाचे योगदान दिले आहे. त्यांनी आतापर्यंत एकूण २० साहित्यकृती प्रकाशित केल्या असून, त्यांच्या साहित्यिक व शैक्षणिक कार्याची यापूर्वीही विविध पुरस्कारांनी दखल घेण्यात आली आहे. उत्कृष्ट शिक्षक म्हणून त्यांना राज्य आणि राष्ट्रीय स्तरावरील पुरस्कारही प्राप्त झाले आहेत. त्यांच्या या उल्लेखनीय कार्याचा गौरव म्हणून त्यांना जिल्हास्तरीय राज्योत्सव पुरस्काराने सन्मानित करण्यात आले.