चिक्कोडी तालुक्यातील शमनेवाडी येथील एस.डी.एम. जैनमठ ट्रस्टच्या ए.जी.एम. अभियांत्रिकी व तंत्रज्ञान महाविद्यालयात प्रथम वर्षाच्या विद्यार्थ्यांच्या शैक्षणिक उपक्रमांचे उद्घाटन (‘आरंभ-२के२६’) मोठ्या उत्साहात पार पडले.

कार्यक्रमाचे मुख्य अतिथी यळळट्टी येथील कोण्णूर शिक्षण समूहाचे संस्थापक प्राचार्य प्रा. बसवराज कोण्णूर यांनी विद्यार्थ्यांना मार्गदर्शन केले. “आजच्या स्पर्धेच्या युगात विद्यार्थ्यांनी बहुआयामी ज्ञान व कौशल्ये आत्मसात केली पाहिजेत. आई-वडील आणि शिक्षकांशी प्रामाणिक राहून कठोर परिश्रमाने यशाकडे वाटचाल करावी,” असे आवाहन त्यांनी केले. आयआयटी धारवाडचे सह-प्राध्यापक डॉ. राहुल पांड्या यांनी, “विद्यार्थ्यांनी केवळ नोकरीच्या मागे न लागता स्वतःचा उद्योग सुरू करण्यावर भर द्यावा आणि अभ्यासासोबतच इतर कौशल्यांचा विकास करावा,” असा सल्ला दिला.

संस्थेच्या संचालिका भाग्यश्री अल गूर यांनी प्रास्ताविक करताना सांगितले की, “परमपूज्य आचार्य श्री १०८ गुणधरनंदी महाराजांच्या आशीर्वादाने ग्रामीण भागातील व गरीब विद्यार्थ्यांना कमी शुल्कात आणि अनाथ मुलांना मोफत शिक्षण देण्यासाठी हे कॉलेज सुरू केले आहे. आगामी काळात मेडिकल, आयुर्वेदिक महाविद्यालये सुरू केली जातील. तसेच व्हीटीयू रँक मिळवणाऱ्यांना परदेश वारी व टॉपर्सना लॅपटॉप/टॅब दिले जातील.” अध्यक्षस्थानावरून बोलताना प्राचार्य डॉ. संजय अंकली यांनी विद्यार्थ्यांना मानवी मूल्ये व व्यावसायिक कौशल्ये शिकवण्यासाठी पहिल्या वर्षापासूनच आयआयटी तज्ज्ञ व एचआर अधिकाऱ्यांमार्फत विशेष प्रशिक्षण दिले जाईल, असे स्पष्ट केले. या वेळी उत्तम निकालासाठी प्राध्यापकांचा सत्कार करण्यात आला.