बेळगाव शहरातील खासबाग भागातील रेणुका नगर परिसरात गेल्या २५ वर्षांपासून गटाराची समस्या सुटलेली नसल्याने स्थानिक नागरिकांना मोठा त्रास सहन करावा लागत आहे. केवळ १२० मीटरचे काम शिल्लक असतानाही प्रशासकीय दुर्लक्षामुळे शेकडो कुटुंबांचे आरोग्य धोक्यात आले आहे.

खासबाग येथील रेणुका नगर आणि शांती वसाहत परिसरात गेल्या २५ वर्षांपासून गटार व्यवस्था ढासळली आहे. मारुती गल्ली ते दुर्गादेवी मंदिर आणि रेणुका नगर मठापासून गणेश पेठेपर्यंत अवघे १२० मीटर गटाराचे काम बाकी आहे, मात्र प्रशासनाने अद्याप कोणतीही ठोस कारवाई केलेली नाही. यामुळे सांडपाणी रस्त्यावर व घरांच्या परिसरात साचून डासांचा प्रादुर्भाव आणि दुर्गंधी पसरली आहे.

दूषित पाणी आणि विहिरींचे पाणी एकत्र आल्यामुळे २० हून अधिक कुटुंबांना आरोग्याच्या गंभीर समस्यांना सामोरे जावे लागत आहे. पीएसआर मानवाधिकार संरक्षण आयोगाने यावर तीव्र संताप व्यक्त केला असून अधिकाऱ्यांनी तत्काळ मूलभूत सुविधा पुरवाव्यात, अशी मागणी केली आहे. दुसरीकडे, कोणतीही पूर्वसूचना न देता अचानक जेसीबीचा वापर करून कारवाई केल्याने स्थानिक नागरिकांमधून तीव्र असंतोष व्यक्त केला जात आहे.

या समस्येवर त्वरित तोडगा काढावा, अशी मागणी स्थानिक रहिवासी आणि सामाजिक संघटनांनी केली असून लोकप्रतिनिधी व अधिकाऱ्यांनी प्रलंबित १२० मीटर गटाराचे काम तातडीने पूर्ण करावे, अशी मागणी होत आहे.