संगनकेरी-हुणश्याळ पी. जी. रस्त्यावर झालेल्या रस्ते अपघातात दोन बाईकस्वारांचा जागीच मृत्यू झाला. भरधाव वेग आणि निष्काळजीपणामुळे हा अपघात झाला असून, घटनेनंतर चालक टिप्पर सोडून पसार झाला आहे.

घटप्रभा पोलिसांनी दिलेल्या माहितीनुसार, विनय विजय हिरेमठ (१९) आणि श्रवण गुरुसिद्धय्या हिरेमठ (१७) अशी मृत तरुणांची नावे आहेत. मोटोसायकलवरून जात असताना समोरून आलेल्या भरधाव टिप्पर लारीने त्यांच्या वाहनाला धडक दिली. धडकेच्या तीव्रतेमुळे दोघेही रस्त्यावर फेकले जाऊन त्यांचा जागीच मृत्यू झाला.

घटनेची माहिती मिळताच घटप्रभा पोलीस ठाण्याच्या अधिकाऱ्यांनी घटनास्थळी पोहोचून पाहणी केली. मृतदेह शवविच्छेदनासाठी रुग्णालयात पाठवण्यात आले असून, फरार टिप्पर चालकाचा पोलीस शोध घेत आहेत. याप्रकरणी गुन्हा नोंदवून पुढील कायदेशीर कारवाई सुरू आहे.