बेळगाव येथील शहापूरमधील शासकीय सरस्वती मुलींच्या पदवीपूर्व कॉलेजमध्ये २०२६-२७ या शैक्षणिक वर्षासाठीच्या १९ वर्षांखालील मुला-मुलींच्या जिल्हास्तरीय कराटे स्पर्धेचे १३ ऑगस्ट रोजी आयोजन करण्यात आले होते.

कर्नाटक सरकारच्या शालेय शिक्षण विभागाच्या (पदवीपूर्व) वतीने आयोजित या स्पर्धेसाठी बेळगाव जिल्हा क्रीडा कराटे असोसिएशनने तांत्रिक सहकार्य केले.

गणेशपूजन आणि मान्यवरांच्या हस्ते दीपप्रज्वलन करून स्पर्धेचे औपचारिक उद्घाटन करण्यात आले. या प्रसंगी उपस्थितांनी विद्यार्थ्यांना शुभेच्छा देत शिक्षणासोबतच क्रीडा क्षेत्रातही त्यांनी उल्लेखनीय यश संपादन करावे, असे आवाहन केले.

जिल्ह्यातील विविध पदवीपूर्व कॉलेजांमधून आलेल्या १९ वर्षांखालील मुला-मुलींनी या स्पर्धेत उत्स्फूर्तपणे सहभाग घेतला. कराटेच्या विविध प्रकारांमध्ये विद्यार्थ्यांनी आपले कौशल्य आणि प्रतिभा सादर केली.

या कार्यक्रमाला बेळगाव दक्षिणचे आमदार अभय पाटील, कॉलेज विकास समितीचे अध्यक्ष एम. एम. कांबळे, पदवीपूर्व शिक्षण विभागाचे उपसंचालक एम. आर. मोठा यांच्यासह प्राचार्य, जिल्हा क्रीडा समन्वयक, सहाय्यक क्रीडा समन्वयक, क्रीडा प्रशिक्षक आणि कराटे असोसिएशनचे पदाधिकारी उपस्थित होते.

बेळगाव जिल्हा क्रीडा कराटे असोसिएशनचे सचिव जितेंद्र बी. काकतीकर यांच्यासह कॉलेज विकास समिती, प्राचार्य, प्राध्यापक व कर्मचाऱ्यांनी स्पर्धेच्या यशस्वी आयोजनासाठी परिश्रम घेतले.

या जिल्हास्तरीय कराटे स्पर्धेच्या माध्यमातून विद्यार्थ्यांना आपल्या क्रीडागुणांचे प्रदर्शन करण्यासाठी उत्तम व्यासपीठ मिळाले असून, पुढील टप्प्यातील स्पर्धांसाठी निवडीच्या दृष्टीने हे अत्यंत उपयुक्त ठरणार आहे.