चिक्कोडी शहरातील रस्त्यांची दुरावस्था पुन्हा एकदा समोर आली आहे. प्रादेशिक परिवहन कार्यालय आणि इतर महत्त्वाच्या सरकारी कार्यालयांकडे जाणाऱ्या मुख्य रस्त्यावर पडलेल्या मोठ्या खड्ड्यांमुळे नागरिकांना जीव मुठीत धरून प्रवास करावा लागत आहे.

वायव्य कर्नाटक राज्य रस्ता वाहतूक महामंडळाच्या चिक्कोडी विभागीय कार्यशाळेसमोरील हा मुख्य मार्ग मुधोळ-निपाणी राज्य महामार्गावरून आरटीओ, डीडीपीआय कार्यालय, अग्निशमन दल आणि खाजगी शाळांकडे जातो. हाच रस्ता चिक्कोडी-निडसोशी मार्गे बेळगावलाही जोडतो.

दररोज शेकडो वाहनांची रहदारी असणाऱ्या या रस्त्यावरील खड्ड्यांमुळे वाहनधारक त्रस्त झाले आहेत. शाळकरी विद्यार्थ्यांना वाहून नेणाऱ्या रिक्षांसाठी हा रस्ता अत्यंत धोकादायक बनला आहे. रस्त्याच्या दुरावस्थेबाबत अनेकदा निवेदने देऊनही संबंधित अधिकाऱ्यांनी कोणतीही कारवाई केलेली नाही, असा आरोप स्थानिकांनी केला आहे.

तातडीच्या प्रसंगी अग्निशमन दलाच्या वाहनांनाही अडथळा निर्माण होण्याची शक्यता असल्याने प्रशासनाने तत्काळ रस्ता दुरुस्तीचे काम हाती घ्यावे, अशी मागणी नागरिकांकडून केली जात आहे.

डी. के. उप्पार
इन न्यूज
चिक्कोडी