बेळगाव बार असोसिएशनतर्फे कर्नाटक राज्य बार कौन्सिलच्या नवनिर्वाचित सदस्यांचा सत्कार करण्यात आला. यावेळी वकिलांच्या कल्याणासाठी सुविधा वाढविण्यासह भरपाई रकमेत वाढ करण्याची मागणी करण्यात आली.

बेळगाव येथील नवीन न्यायालय संकुलातील वकील समुदाय भवनात आयोजित कार्यक्रमात राज्य बार कौन्सिलसाठी निवड झालेल्या आय. एम. पाटील, कल्मेश किवड, ए. ए. मगदूम, बी. व्ही. कोरीमठ आणि व्ही. डी. कामारेड्डी यांचा सत्कार करण्यात आला. बेळगाव बार असोसिएशनचे अध्यक्ष बी. जे. गंगाई, पदाधिकारी आणि सदस्य यावेळी उपस्थित होते.

कार्यक्रमात बोलताना बार असोसिएशनचे अध्यक्ष बी. जे. गंगाई यांनी वकिलांच्या हितासाठी आणखी अनेक उपाययोजना करण्याची गरज असल्याचे सांगितले. सध्या वकिलांना मिळणाऱ्या ८ ते १२ लाख रुपयांच्या भरपाई रकमेत वाढ करून ती १५ ते २० लाख रुपये करण्यात यावी, अशी मागणी त्यांनी केली.

वकिलांच्या वेल्फेअर फंडचा योग्य वापर करून तातडीच्या वैद्यकीय सेवा आणि आवश्यक मदत उपलब्ध करून देण्यासाठी प्रभावी व्यवस्था निर्माण करण्याची गरज असल्याचे त्यांनी सांगितले. तसेच बार असोसिएशनसाठी जागेची कमतरता असून, केवळ बेंगळुरूपुरते मर्यादित असलेल्या मूलभूत सुविधा उत्तर कर्नाटकातील वकिलांनाही उपलब्ध करून द्याव्यात, अशी अपेक्षा त्यांनी व्यक्त केली.

नवनिर्वाचित बार कौन्सिल सदस्यांनी वकिलांच्या समस्या आणि कल्याणासाठी आवश्यक पावले उचलावीत, असे आवाहन यावेळी करण्यात आले. कार्यक्रमाला बार असोसिएशनचे पदाधिकारी आणि सदस्य उपस्थित होते.