माजी मंत्री सी. टी. रवी यांच्या वक्तव्यावर आक्षेप घेत कर्नाटक राज्य मुल्ला असोसिएशनने निषेध व्यक्त केला आहे. मुल्ला समाजाबाबत अवमानकारक वक्तव्य केल्याचा आरोप करत त्यांनी सी. टी. रवी यांनी तत्काळ जाहीर माफी मागावी, अशी मागणी केली आहे.

विजापूर येथे झालेल्या पत्रकार परिषदेत कर्नाटक राज्य मुल्ला असोसिएशनचे नेते एम. सी. मुल्ला यांनी सी. टी. रवी यांच्या वादग्रस्त विधानाचा तीव्र निषेध केला. दिल्लीतील जंतरमंतर येथील आंदोलनावर बोलताना रवी यांनी संपूर्ण ‘मुल्ला’ समाजाच्या भावना दुखावल्या असून, इतिहासात मान्यता असलेल्या या ओढीविषयी अवमानकारक भाषेचा वापर करून जबाबदारी टाळण्याचा प्रयत्न केला जात असल्याचे त्यांनी सांगितले. शिस्त व संस्कारांची शिकवण देणाऱ्या नेत्यांनी याप्रकरणी जाहीर माफी मागावी आणि राज्य सरकारने या प्रकरणी योग्य कायदेशीर कारवाई करावी, अशी मागणी संघटनेने केली आहे.

यावेळी बोलताना एम. सी. मुल्ला यांनी देशाच्या प्रगतीत मुस्लिम समाजाच्या योगदानावर प्रकाश टाकला. प्रशासन, न्यायव्यवस्था, शिक्षण, कला, क्रीडा आणि विज्ञान यांसारख्या विविध क्षेत्रांत मुस्लिम समुदायाचे योगदान अत्यंत मोलाचे आहे. डॉ. ए. पी. जे. अब्दुल कलाम आणि डॉ. झाकीर हुसेन यांच्यासारख्या महान व्यक्तींनी देशाच्या सर्वोच्च अशा राष्ट्रपती पदाची धुरा सांभाळून देशाला बहुमूल्य सेवा दिली असल्याचे त्यांनी आवर्जून नमूद केले.

माफी न मागितल्यास कायदेशीर लढ्यासह विविध प्रकारची आंदोलने करण्यात येतील, असा इशारा कर्नाटक राज्य मुल्ला असोसिएशनने दिला आहे.

पत्रकार परिषदेला शमशर अली मुल्ला, शहजान मुल्ला, मुस्ताक मुल्ला, रिझवान मुल्ला आणि एम. एम. मुल्ला यांच्यासह संघटनेचे पदाधिकारी उपस्थित होते.