महाराष्ट्रातील पश्चिम घाट क्षेत्रात मुसळधार पाऊस सुरू असल्याने चिकोडी व निपाणी तालुक्यातील कृष्णा नदीकाठच्या गावांमध्ये पुन्हा एकदा पुराची भीती निर्माण झाली आहे.

महाराष्ट्रात होत असलेल्या पावसामुळे कल्लोळ गावाजवळ कृष्णा नदीत तब्बल ७० हजार क्युसेक पाण्याचा विसर्ग सुरू आहे. परिणामी, एकाच दिवसात नदीच्या पाणी पातळीत २ फुटांची वाढ झाली आहे.

कृष्णा व तिच्या उपनद्यांच्या पाणी पातळीत अचानक वाढ झाल्याने चिकोडी आणि निपाणी तालुक्यातील सात कमी उंचीचे पूल पाण्याखाली गेले आहेत.

यामध्ये येडूर – कल्लोळ, बावन सौंदत्ती – मांजरी, बारवाड – कुन्नूर, कारदगा – भोज, भोज – शिवापूरवाडी, अक्कोळ – सिद्नाळ आणि हुन्नरगी – ममदापूर या पुलांचा समावेश आहे.

पूल पाण्याखाली गेल्याने परिसरातील गावांचा थेट संपर्क तुटला असून नागरिक व वाहनधारकांना पर्यायी मार्गांचा वापर करावा लागत आहे.