नीट प्रश्नपत्रिका फुटल्याच्या निषेधार्थ नवी दिल्लीत शांततापूर्ण आंदोलन करणाऱ्या विद्यार्थ्यांवर पोलिसांनी केलेल्या लाठीमाराचा निषेध करण्यासाठी चिक्कोडीतील सदलगा शहरात विविध संघटना आणि विद्यार्थ्यांनी भव्य निषेध रॅली काढली.

डॉ. ए.पी.जे. अब्दुल कलाम सामाजिक, शैक्षणिक युवा संघ, भीम आर्मी, शेतकरी संघटना आणि विद्यार्थी बंधुत्व मंच यांच्या संयुक्त विद्यमाने हे आंदोलन आयोजित करण्यात आले होते.

शहरातील कुवेम्पू शाळा आवारात जमलेल्या शेकडो कार्यकर्ते आणि विद्यार्थ्यांनी मानवी साखळी करून केंद्र सरकारविरोधात तीव्र संताप व्यक्त केला. प्रमुख मार्गांवर रॅली काढून आंदोलकांनी केंद्र सरकारविरोधात घोषणाबाजी केली. त्यानंतर उपतहसीलदार पी. बी. सिरिवंत यांच्यामार्फत राष्ट्रपतींना निवेदन सादर केले.

विद्यार्थ्यांवर झालेल्या लाठीमाराची तात्काळ पारदर्शक चौकशी व्हावी, अशी मागणी डॉ. ए.पी.जे. अब्दुल कलाम सामाजिक आणि शैक्षणिक युवा संघाचे अध्यक्ष अर्जुद्दीन शेखजी यांनी केली.

आपल्या भविष्यासाठी कायदेशीर आणि शांततापूर्ण मार्गाने लढा देणाऱ्या विद्यार्थ्यांवर अन्याय करून त्यांचा आवाज दाबण्याचा प्रयत्न केला जात आहे, अशी प्रतिक्रिया संतोष नवले, सचिन माळगे आणि तुषार कांबळे यांनी दिली.

या आंदोलनात मराठा समाजाचे अध्यक्ष अनिल माने, महिला आघाडी अध्यक्षा सुमया जमादार, हरिश हित्तलमणी, भीम आर्मी अध्यक्ष आकाश चिट्टिस, टिळक हित्तलमणी, भीमा माळगे, बसवराज वाली, अश्वत्थ माळकरी, प्रवीण कुरणे, विशाल मेत्रे, बसवराज कोळी यांच्यासह विविध संघटनांचे पदाधिकारी व विद्यार्थी उपस्थित होते.